uMthunywa
YiNtatheli kaMthunywa
ABADLALI bethenisi kuleli sebelungiselele baphelela ukuyaqala imncintiswano yenhlanganiso ye-International Tennis Federation (ITF).
Iqembu lesizwe lizakhokhelwa nguEthan Sibanda umdlali waphezulu, okusibanga sesithathu emhlabeni. Umdlali lo uyingxenye yeqembu elilabadlali ababalisa uTaona Mhwandagara, Tinashe Tarubereka, Benedict Badza, loThompson Thomu.
Kuqula lamantombazana, kuzancintisa Rufaro Magarira, Chelsea Chakanyuka, Tadiwanashe Mauchi, Tanatswa Musabaeka, Charlotte Zhuwakini, Tanyaradzwa Midzi loTadisa Chamisa.
Unobhala weTennis Zimbabwe, inhlanganiso ephethe kumdlalo kuleli, uCliff Nhokwara uthe balokuthaba ukuthi sebelungiselele.
ITennis Zimbabwe ibisalinde ukutshelwa yinhlanganiso yeSport and Recreation Commission ukuthi iqalise imncintiswano ngokupheleleyo.
“Abadlali bethu balindele ukuthi bangene enkundleni bancintisane lezinye intshantshu zomhlaba,” kutsho unobhala lo ekhuluma loMthunywa ngoMvulo.
Umdlalo wethenisi ubungaka nikezwa imvumo yokuqalisa kulandela ukuqhamuka kweCovid-19. Kwamanye amazwe bekudlalwa kodwa kuleli bekusehlula ngoba isizwe besingakalungiseleli.
