uMthunywa
YiNtatheli kaMthunywa
UBUKHOSI Ncube, imvimbi yeqembu leHighlanders obephathekile ngokulimala unyawo ngesizini edluleyo uselethe injabulo kubalandeli bethimu le, nanko phela usesile wavuka khwatshu ngemva kwesikhathi eside engalugxobi enkundleni.
Ukusila komdlali lo odume ngelithi “Khosera” kuzathabisa abasekeli ngenxa yokuthi ubakhumbuza ithalenta labadlali abadla ubhedu ababalisa uSimon “MaKwe” Sibanda loNoel Kaseke.
Iphephandaba likazulu lihlangane laye lumdlali kunsukwana ezimbalwa ezedluleyo kwavela ukuthi lonyaka amanye amaqembu azayifunda ivaliwe nxa esevimba igedi leBosso lumdlali.
Ebuzwa ngesimo sakhe umdlali uthe ‘usepholile’ kodwa kazange atsho okunengi ngoba abadlali beHighlanders abavunyelwa ukutsho imbono kumaphephandaba.
“Sengipholile sibili njalo ngiqinile,” kutsho lumdlali.
Ngesikhathi ehlezi ebhentshini likadokotela, indawo kaNcube ibikhanya ukuthi iyabehlula abanye abadlali, okuyikho obekusenza kube lula ukuthi abagadli bamaqembu bayithwalise nzima iHighlanders emhlubulweni wesandla sokhohlo enkundleni.
UNcube usetshengisele ukuthi ulekusasa ngobungcitshi bakhe kuqembu njalo wabayinsika kuqula labadlali abaqoqwa nguMadinda Ndlovu ekuqaleni kwesizini ka2018, lapho iHighlanders eyaphenduka into engadliwayo.
Kwabonakala ukuthi uNcube ngumdlali wohlonzi mhla iHighlanders inqoba iDynamos ngoba wavala kwakhala abanengi.
Ekuqaleni lumdlali ubengalitholi ithuba lokuzibonakalisa okwamnikeza idlabuzane lokuthi atshengise uMadinda ukuthi ulalo ithalenta alidingayo kumvimbi zakhe.
Lakanye watshengisa lumqeqetshi ukuthi ubesenza iphutha ngokumfaka ebhentshini.
UNcube ubabazwa ngabasekeli ababika ukuthi umdlalo abathe uyazi ukuphasa ibhola liyefika enyaweni zabanye bakhe.
Omunye wabalandeli olilunga leHighlanders okweqiniso uThabisa Dube owaziwa ngelithi “Gundu” uthe loba uBukhosi esesilile, kubalulekile ukuthi alolonge kakuhle.
UDube uthe umdlali lo ubakhumbuza iBosso yakudala labadlali ababalisa uMaKwe loKaseke.
“Nxa esephendukile umfana enkundleni, kuzindaba ezinhle lezo. Kuzaba kuhle njalo uma umqeqetshi engamdlalisa endaweni yakhe kwesokudla ngoba yikho lapho adlala aphelele.
“Ngimkhuthaza ukuthi ananzelele indlela agxoba ngayo ukuze aphange ukugijima eseqinile,” kutsho uDube.
