Usengumal’ iyavuza u-Teenage Hadebe

25 May, 2023 - 00:05 0 Views
Usengumal’ iyavuza u-Teenage Hadebe uTeenage Hadebe

uMthunywa

YiNthatheli kaMthunywa

UMDLALI wakuleli okuqembu leHouston Dynamo uTeenage Hadebe usephuma ebhanga eyithwele ngengowane imali, nanko usekhwezelwe iholo ngokuphindiweyo.

I-Houston Dynamo idlala kuligi yeMajor League Soccer (MLS) eMelika. Ukudlala kukaHadebe kubikwa kujabulise abanikazi baleliqembu, abakubone kufanele ukuthi bamholise imali ephezulu.

Kumbiko ephuma kunhlanganiso yeMajor League Soccer Players Association, uHadebe kulisizini uzahola imali engange-US$$1  288  077.
Lokhu kutsho ukuba uHadebe usengumdlali wesithathu okhokhela ngokuhola imali ephezulu kuHouston Dynamo, elandela uHector Herrera loAustin Ferreira.

Kuvele ukuba iholo likaHadebe likhwezwe ngemali eyedlula i$155 000 nxa iqathaniswa laleyo ayihola mhla eqala ukudlala kuMLS. Umdlali lo uqale ukudlalela iHouston Dynamo ngomnyaka ka-2021.

Kuphawulwe ukuba imali eholwa nguHadebe igoqela konke okubalisa lamabhonasi.
Phezulu kwalokho, iholo leli ligoqela lenzuzo ephuma kunhlelo zokuthengisa ibizo leqembu kumabhizimusi, lemali ka-agent womdlali.

Kusenjalo, uHadebe ulakho ukukhutha imidlalo eyisithupha eyeHouston Dynamo ethile kulandela ukuhlinzwa konyawo lwakhe ngodokotela. Umaneja weqembu uBen Olsen ubike ukuba umdlali lo usephumile esibhedlela njalo konke kuqhubeke kuhle.

UHadebe ubike ebulenjini kukhasi lakhe le-Twitter lapho athe usaphumula. Umdlali lo usenconywe kakhulu ngokuvimba kakuhle, okuncedise ukuthi iqembu lakhe liqhubekele phambili ngokunqoba kuMLS.

Share This:

Sponsored Links

Survey


We value your opinion! Take a moment to complete our survey

This will close in 20 seconds