uMthunywa
YiNtatheli kaMthunywa
UMANEJA kaBenni McCarthy, uRob Moore, ubeka isizatho esenze umqeqetshi lo waqhatshwa yiManchester United edlala ku-English Premier League, eNgilandi.
English Premier League
Inkulu injabulo ebantwini beMzansi Africa kulandela ukuqhatshwa kukaMcCarthy, njengomqeqetshi wabagadli bamaRed Devils.
Lokhu kutsho ukuthi uzabe ekhuza abagadli bezinga eliphezulu ababalisa uMarcus Rashford, Jason Sancho loCristiano Ronaldo.
Indaba zokuqhatshwa kukaMcCarthy ziqinisekiswe yi-Man United kumbiko wayo ebulenjini ngoMgqibelo.
UMoore selokhu waphatha indaba zikaMcCarthy kusukela esangumdlali, uveze ukuthi kungakapheli isikhathi esinganani iManchester yethule u-Erik ten Hag oweNetherlands, ubesehambise iCV kaMcCarthy.
Uthe okwenza wayihambisa yikuthi eminyakeni edluleyo, uMcCarthy uke wasebenza loTen Hag ku-Ajax Amsterdam futhi babelobudlelwano obuhle.
Umaneja lo uveze ukuthi ngempela uMcCarthy umsebenzi kumaRed Devils, uwuqale ngeSonto edluleyo.
“Ngamcebisa uHag ngokuthi nxa efuna umuntu ozakwazi ukuqonda lokugxilisisa abadlali isitayela sakhe (seDutch) kumele asondeze uMcCarthy.
Uwuthole kanjalo ke umsebenzi,” kutsho uRob Moore Okunye okuhle ukuthi uMcCarthy uyaliqonda ibhola lase-England, njengoba eke wadlala khona,”
kubeka uMoore ophathe lezindaba zabadlali okubalwa uRonwen Williams weMamelodi Sundowns loNjabulo Blom weKaizer Chiefs
UMcCarthy uke wadlala kumasizini ayisithupha kuBlackburn Rovers.
Ubexotshwe ngaMaZulu ngoMbimbitho, ngoba kukhalwa ngempumela engemihle ngesizini edluleyo.
Ngaphambi kwalokho, wenze kahle kusizini yakhe yokuqala kuSuthu, aqeda endaweni yesibili kulogu edlala okokuqala kuCaf Championship League.
Umqeqetshi lo ulezithupha zokuqeqetsha ze-UEFA Pro Licence okumenza akwazi ukukhuza kumaligi aphetsheya.
Uke waqeqetsha kuCape Town City, wanqoba isicoco seMTN 8.
Manchester United
Abalandeli beManchester abamkhohlwa uMcCarthy njengoba wabaphula inhliziyo ngesikhathi bedlala layo ku-Last 16, ku-Uefa Champions League, ngo-2004.
