‘Usenga ezimithiyo uKamambo’

24 Jan, 2019 - 00:01 0 Views
‘Usenga ezimithiyo uKamambo’ Felton Kamambo

uMthunywa

YiNtatheli kaMthunywa
IMPI phakathi kukaGift Banda loFelton Kamambo kunhlanganiso yeZifa isivutha futhi, nanko kubikwa ukuba uBanda usezimisele ukuveza ‘iqiniso’ ngokuxabana kwakhe lesikhulu senhlanganiso.

Lokhu kuza ngemva kokuba iZifa imise uBanda umsebenzi ngenxa yokuthi wabika ngokuqhatsha kwabasekeli bomqeqetshi wamaWarriors ababili.

UBanda wabika ukuthi sebeqhatshe uBongani Mafu loTonderayi Ndiraya endaweni kaLloyd Mutasa loRahman Gumbo. IZifa ithe lokho kwenzakala ngaphandle kwemvumo yebhodi, ngakho uBanda wephula umthetho.

Okwamanje, kuzwakale ukuba iqula eliseduzane loBanda likhathazekile ngalesi isehlakalo. Kubikwa sekulindwe ukuthi umsekeli kamongameli weZifa lo azigeze kulindaba.

Abafakazi abaqotho batshele iphephandaba likazulu ukuba uBanda uzakhuluma imbangela eyenza wabikela umphakathi ukuthi iZifa isiqhatshe abasekeli bomqeqetshi wamaWarriors abatsha.

Kuliviki, ngokutsho kwabafakazi bodaba, uBanda uzaveza ukuthi kungani uKamambo lamanye amalunga eZifa bexabana laye.

“Kuliviki uBanda uzakhuluma olwakhe udaba ngokwenzakala kunhlanganiso yeZifa. Uzakhuluma ukuthi uFelton Kamambo ulamanga.

“Kuzavela ukuthi uBanda kazange aqamule umthetho ngoba ukuqhatshwa kwabaqeqetshi abatsha kwakulicebo likaFelton lomqeqetshi wamaWarriors,” kutsho omunye wabafakazi bodaba oseduzane lewofisi kaBanda.

Umfakazi lo uqhubekele phambili wathi ‘amanga’ akhulunywa nguKamambo aveza ukuthi umongameli lo usesehluleka ukugcwalisisa izithembiso zakhe zokuguqula iZifa.

“Kuzaphuma egcekeni ukuthi ukumisa uBanda umsebenzi kwenziwa ngaphandle kwesisekelo sombuso.”

Ukungezwani kukaBanda loKamambo sekubuyisele muva inhlelo zeZifa, ikakhulu amalungiselelo eqembu lesizwe kumkhankaso walo womcintiswano weAfcon.

Inkokheli zombili zingene esikhundleni ngoMpalakazi kulandela ukunqoba kukhetho.

Imzamo yokuxhumana loBanda yehlule njalo locingo lukaKamambo lukhale lwahawula ngesikhathi uMthunywa edinga ukuzwa umbono wakhe.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds