uMthunywa
YiNtatheli kaMthunywa
NGESIKHATHI kucatshangelwa ukuba uDenzel Khumalo usephele ‘‘umsobho’’ kumdlalo wenguqu, umdlali lo uvuke kwabafileyo wenza isimanga eMagumeni.
UKhumalo uhlohle umvema webhola iBosso idibene leFC Platinum kunkezo yeChibuku lapho Amahlolanyama aqhubekele phambili kulandela ukunqoba nge 3-0.
Umdlali lo ubeyinsika yokunqoba kweBosso kusukela kumzuzu wakuqala eyibambe phambili kunombolo yomgadli wokucina. Uphenduke waba yisithandwa senkundla yonke ngokwenelisa ukureyitsha lokupasa ibhola lifike emuntwini.
Ukuhlangana kwakhe loPrince Dube kwenze kwabalula ukudabula imvimbi zeFC Platinum ezibone intuthu phambili kwegedi.
Ebuzwa ngesimo salumdlali ngeSonto, umqeqetshi uHendrik Pieter de Jongh uthe wonke umdlali eqenjini lakhe kumele athole ithuba.
“Nxa umuntu efanele ukudlala, kumele adlale,” kutsho lumqeqetshi ngemva komdlalo wangeSonto.
UKhumalo ubesediniwe ngokukhuhla ibhentshi, abaqeqetshi bengafuni ukumkhetha. Ukudlala akwenzileyo kuvele kwadanisa lezitha zakhe ebezinakana ukuthi akusela lutho kuye.
Andubana athole ukwethenjwa nguDe Jongh, uKhumalo ubesetshayisa abadala beqembu labasekeli ngamakhanda.
Umdlali lo kwasala kancinyane ukuthi axotshwe eqenjini ngenxa yokungezwa. Kuthe esebona ukuthi umphako usuphela, waphanga wayaxolisa eloba incwadi yokuthi inkokheli zeqembu zimnikeze ithuba lokuthi adlale ngoba lokho akwenzayo kwaba liphutha.
Umgcinisihlalo weHighlanders uKenneth Mhlophe uthe njengenkokheli bakubona kungcono ukuthi bemxolele lumdlali ngoba elekusasa enhle.
“Umdlali wethu samkhuza, samncedisa lapho ayefuna khona uncedo. Njengomzali, umntwana nxa engenza iphutha kumele umxolele, ungamlahleli iganga. UDenzel usenze okuhle ngokuphenduka ngokuhlohla lokudlala kuhle,” nguMhlophe lo.
Kunyanga ezedluleyo, uMhlophe wachathekela iphephandaba likazulu udaba lokuthi iBosso iphezulu kwamalungiselelo okuncedisa uDenzel ukuthi athole usizo lwabodokotela.
“Usevuke khwatshu. Sibonga imizamo yomqeqetshi omutsha. Banengi abadlali asebetshengisa inguquko.”
