UMGADLI weHighlanders uDenzel Khumalo usezadlala njalo nanko iqembu libika ukuba uselungele ukuthi aphenduke enkundleni loba nini.
UKhumalo akubuzwa muntu ukuthi ulethalenta likanobhutshuzwayo kodwa ngenxa yokukhula ikhanda, lumdlali ubeselihlongandlebe, okwenze waswelakala emdlalweni.
Lumdlali walolonga umdlalo wakhe ngaphansi kwamaqembu abasakhulayo kuHighlanders.
Ukuphenduka kwakhe enkundleni kuzathabisa inengi labasekeli abasebebuze bahawula bengatholi impendulo ngalumdlali.
Kuliviki umgcinisihlalo weHighlanders uKenneth Mhlophe ubikele amalunga uqobo eqembu lakhe mayelana lomdlali uDenzel.
UMhlophe uthe iqembu laqoqa ukuthi uDenzel akhuzwe ngakho kwaba lokudingisisa ukuthi kuyini okuhlupha lumdlali.
“Ngiyathaba ukulazisa ukuba abafana bayahlonipha, bazibambile. Kodwa kulendaba kaDenzel Khumalo owatholakala elecala lokungabuyi emsebenzini.
“Umdlali lo, osakhulayo wajeziswa njalo usephendukile ukuzololonga leqembu. Abaqeqetshi bamkhangelisise kakhulu. Umdlali lo usethola usizo lokujulisisa ingqondo ukuze aphakamise ithalenta lakhe,” kutsho uMhlophe.
Umgcinisihlalo lo uthe ulokukholwa ukuthi akusoze kube lokungezwani phakathi kwabadlali lenkokheli. Ekuqaliseni komnyaka abadlali beBosso bakhalala umsebenzi okwamaviki amathathu besithi bafuna iholo elingcono.
UMhlophe wazise njalo ukuba ukuthethwa kodaba lweziphathamandla umsekeli wakhe uModern Ngwenya lonobhala u-Israel Moyo kuyaphambili.
“Angeke ngitsho okunengi mayelana lomsekeli kamgcinisihlalo uModern Ngwenya lonobhala u-Israel Moyo ngoba lusahlaziywa udaba lwabo.”