uMthunywa
YiNtatheli kaMthunywa
NGESIKHATHI kusakhulunywa ngekusasa yomsekeli kamqeqetshi weHighlanders uJoel Luphahla, iqembu leMWOS FC kubikwa selimhahabela.
Ziyaphithizela inkundla zokuxhumana kuliviki ngaloludaba lapho okubikwa ukuba ngoMgqibelo uLuphahla engabe esethulwa njengengxenye yabaqeqetshi beleliqembu.
Iqembu leMWOS FC lisekelwa yinkampani yodumo egxile kwezokubheja imidlalo.
Okwamanje uLuphahla usasebenzela iHighlanders njalo lehofisi yalo ephathelane lokuphuma kwembiko, igcizelela ngokuthi umqeqetshi lo usasehlelweni lwethimu.
uJoel Luphahla
Isivumelwano sikaLuphahla leBosso siyalenga ngoba kulembiko yokuthi ibhodi yeqembu ayisamfuni.
Kubikwa kulehlekana elithi kasuswe ngoba akala sithupha seCaf A esivumela ukuthi akhuze abadlali.
ULuphahla ule-Caf C, ngakho kavunyelwa ukuhlala ebhentshini emdlalweni. Umthetho omutsha webhola uvumela ukuthi abaqeqetshi labasekeli babo kumele baphathe isithupha seCaf A. Lo kube ngumthetho ohlasele amaqembu amanengi njalo lomunye umsekeli kamqeqetshi weHighlanders uAntonio Torres wehluleke ukuqeda isizini esebhentshini ngesizatho lesi.
Inengi labaqeqetshi lehluleka ukufundela izithupha zaphezulu ngenxa yeCovid-19.
iCovid-19
Ukukhonjiswa yiMWOS F kungaba lithuba elihle kuLuphahla.
Umaqhuzu weBosso uRonald Moyo ubike ukuba kazi lutho ngokusuka kukaLuphahla.
uRonald Moyo
“Angazi lutho ngalokhu. ULuphahla ngomunye wabasekeli bomqeqetshi wethu uBaltemar Brito.
Siphezulu kokulungiselela isizini,” kutsho uMoyo ebikela intatheli.
Imizamo yokuthintana loLuphahla kumbe iqembu leMWOS FC yehlule ngokuya kwelanga ngoLwesithathu, kodwa abafakazi abaqotho bathe kunsukwana ezilandelayo uzavalelisa kwekaMatshobane.
Ngokudingisisa kwephephandaba likazulu, kuvele ukuba iMWOS FC ithe izethula iqula labaqeqetshi balo ngoMgqibelo, lapho okukhangelelwe ukuba uLuphahla uzabizwa.
