Nkosilathi Sibanda
ABALANDELI bebhola likanobhutshuzwayo bakuleli sebephinde bakhala njalo, nanko phela zingakomi, uGeorge Chigova usedlule emhlabeni.
UChigova ubengunozinti wakuleli obebambela iqembu lesizwe elamaWarriors leqembu leSuperSport United, eSouth Africa.
Udlule emhlabeni ngoLwesithathu, eleminyaka engu-32 yokuzalwa.
Kubikwa uChigova ubelesikhathi engezwa kuhle emzimbeni. Kwatholakala ukuthi ulesifo senhliziyo ngenyanga kaNtulikazi, okwadala ukuthi ehluleke ukulolonga ekuqaleni kwesizini.
Umbiko owavela kumqeqetshi weSuperSport United uGavin Hunt ngenyanga ezine ezedluleyo, waveza ukuthi uChigova wayephethwe yisifo esibi.
Umuyi wadlalela iqembu leGunners leDynamos andubana ayedinga amadlelo aluhlaza eSouth Africa.
Umdlali lo waphuma ekolitshini lenguqu elihlonitshwa kakhulu ele-Aces Academy.
