uMthunywa
Bongani Ndlovu
USELE emiswe lezingqwele zenguqu yaseZimbabwe uPrince Dube ngemva kokuphosela amabhola amathathu emambuleni eMagumeni ngeSonto lapho iqembu lamaWarriors elibhuqe elakwele Mauritius nge 3-1.
Lanxa isizini yakhe yeligi yalonyaka leBosso ibinzima nanko phela iqembu leli lihleli kunombolo yesi -14 kulogu yeligi yakuleli, uPrince usele ebalwa lengqwele zomdlalo wenguqu kweleZimbabwe ngemva kokuba ebe ngumdlali wesikhombisa ukutshayelela amabhola amathathu emdlalweni owodwa kusukela uKnowledge Musona ngomnyaka ka2017 amaWarriors edlala leLiberia.
Kusukela ngeSonto, uDube usebalwa lengqwele zakuleli ezifana lobhudi omdala isivula mnyango uShackman Tauro ngomnyaka ka1982, owalandelwa nguVitalis Takawira ngo1995, kwathi ngomnyaka ka1997 kwalandela uGilbert Mushangazhike, ngomnyaka ka1999 uAgent Sawu laye wenza ibizo ngawakhe amathathu. USawu yena walandelwa nguPeter “Nsukuzonke” Ndlovu ngomnyaka ka2004 lapho bekhangelane leSwaziland Emagumeni, kwalandela uKnowledge Musona ngaphambi kokuba edlulisele kuDube uhlanga.
Iphephandaba likazulu libuye laxhumana loNdabazinhle Hlongwane ongumlandeli omkhulu weqembu lesizwe othe kuhle kakhulu okwenziwe nguPrince Dube.
“Kithi abalandeli beBosso leZimbabwe yinto enhle le eyinziwe nguPrince ngesikhathi abantu bekhuluma kubi ngaye ngoba ngalesi senzo usenelise ukuthi azakhele udumo, kukanti kithi abalandeli usesiphe idlabuzane lokuthi simkhusele kakhulu emidlalweni ukuze ahlohle ngoba useyincitshi,” kuchaza uHlongwane.
Ugcizelele ngokuthi uPrince uphinde wabonisa wonke umuntu ukuthi ungumhlobo bani womdlali.
“Kasijabulelanga ukuhlohla kukaPrince kuphela kodwa lakumdlalo wakhe wangeSonto uveze ukuthi uyintshantshu njalo ngithemba uLulu ubembukele lumdlali ngeSonto,” kuchaza Hlongwane.
Umqeqetshi weqembu uRahman Gumbo yena ubengela amanengi amazwi ngaphandle kokukhonona ngesiqephu sokuqala somdlalo.
“Ngezinga lakuqala sidlale kubi kakhulu njalo ngicabangela ukuba abadlali basuke beyisa kakhulu, kodwa sijabulile ngokunqoba lokudlulela phambili kundebe yeAfrican Nations Championship,” kuphetha uGumbo.
