uMthunywa
Thokozile Mbedzi
KUDUMA ikhanda kowesifazana wesigabeni seMatandavari eZaka olengane elenyanga ezimbili olufe ngemva kokuqhamuka komlilo endlini obelulele kuyo.
Isehlakalo lesi senzakale ngempelaviki edluleyo ngesikhathi unina wosane esemasimini.
Kuzwakale ukuba unina wosane lolu olungumfana, uMiriam Vengesayi oleminyaka engu-23, watshiya elulalise emkulwini esiya emasimini, ngokusweleka kwenhlanhla kwasekuqhamuka umlilo lwatshela phakathi.
Ekhuluma lentatheli kaMthunywa uSelina Mpofu uthe behlulekile ukunceda usane.
“UMiriam watshiya usane endlini kadadewabo uAnna Vengesayi oleminyaka engu-36, abathethwe yindoda yinye. Ababili laba basuka baya emasimini besiyahlakula endaweni eyayingaba yisibanga samamitha angu-70.
“UAnna wasephenduka ngekhaya efuna ukuntshintsha umphini wekhuba lakhe, yikho lapho athola khona indlu isisitsha wasebiza umnawakhe bazama ukuyicitsha ngamanzi lenhlabathi kwehlula, yatsha uphahla lwaze lwawela phakathi, usane olwaluphakathi lwatshal wasala lungasabonakali.”
Isikhulumi samapholisa esabelweni seMasvingo uInspector Kudakwashe Dhewa ebuzwa ngodaba lolu uvumile wathi solufikile ehofisini yakhe.
“Udaba losane olutshele endlini solufikile ehofisini yethu. Sisaphenyisisa ngodaba lolu,” kuphetha uInsp Dhewa.
