uMthunywa
Nkosilathi Sibanda
NGEMVA kweminyaka eyedlula amatshumi amabili ethokozisa umphakathi, umculi wodumo uSandra “Sandy” Ndebele-Sibindi usebike ukuba ulokhe elomfutho nanko phela uzethula idlalade elitsha kulimpelaviki.
Umculi lo uzakwethula idlalale lakhe letshumi enkundleni yeZimbabwe International Trade Fair (ZITF) kuHall 3 ngoMgqibelo ntambama, kumcimbi okhangelelwe ukuthi unxuse phose idolobho lonke.
Kuleli idlalade alibize ngokuthi Sandra Ndebele umhlabeleli lo uthe uhlose ukuthi aziveze ubunguye bakhe kubalandeli.
USandy ubike ukuba ngemva kokulalela idlalade lakhe, abathandi bomculo bazavuma bodwa ukuthi ingoma zakhe zilomsoco. Ekuphekeni idlalade leli, usebenze labaculi ababalisa iPlatform One, Exmile loprojusa wodumo u-Oskid.
Akula mculi kuleli osenelise ukuhlanganisa ingqungquthela zomculo ezilezinga laphezulu kanje.
Kuminyaka yonke le ejabulisa abantu, uSandy usephenduke waba ngumculi osethole inhlonipho kundawo zonke zelizwe, okuyikhona okwenza umcimbi wakhe udonse amehlo.
Intatheli yephephandaba likazulu ixoxe loSandra ngoLwesibili emini, ngesikhathi elolonga lequla lakhe, lapho abike ukuba idlalade elitsha liyisiboniso sokukhula kwakhe kwezomculo.
“NgoMgqibelo indlela ziqonda eZITF, Hall 3. Ngilethulela idlalade lami letshumi. Woza labangane bakho,” kutsho umculi lo.
ZITF
“Ngiyethula idlalade elithiwa Sandra Ndebele. Lo ngumsebenzi oveza ubuyimi bami. Limumethe ingoma ezilitshumi, eziphekwe ngohlobo lwaphezulu okokuthi loba ngubani uzazijabulela ingoma.”
Umhlabeleli lo uthe ngoMgqibelo kuthunqa intuthu enkundleni ngoba idlalade lizayethulwa ngendlela ezatshiya inengi libabaza ngobuciko obuzabukiswa.
Intatheli izibonele mathupha amalungiselelo kaSandy elequla lamantombazana agidayo afika amatshumi amabili, labanye abaculi bakuleli.
“Akubizwa ozwayo. Kuzabe kuyikudla kwamehlo,” kubika uSandy.
Ekhuluma ngempilo yakhe kwezomculo, uSandy ubike ukuba kwabaluhambo aluqalisa esafunda esikolo.
“Ukuhlabela yinto ebengivele ngiyithanda ngisasemfitshane. Ekukhuleni kwami bengithanda ukungena emincintiswaneni yokuhlabela esikolo kodwa ngikhule ngithanda ezamasiko.
“Kudala bengisenza ama-shows phose ilizwe lonke nje jikelele ngicula njalo ngigida ezamasiko. Lokhu yikho okwangenza ngaziwa ngabanengi. Khathesi sengikhethe ukuthi ngintshintshe ukwenza ngiqale ukusebenzisana labanye abahlabeleli bakuleli labaphetsheya,” kutsho uSandy.
Ubonge abalandeli bomculo wakhe, wathi kungayisibo, ubengeke afike izinga akulo.
“Bakithi ngiyabonga. Ngibonga lina balandeli bomculo wami. Yini elisabalalisa imisebenzi yami.
Akuqhubeke kunjalo. Ngibonga labanye abaculi bakuleli abahlala bengikhuthaza njalonje.”
Kubikwa osaziwayo kwezomculo abazabe bekhona babalisa iPlatform One, uProfessor, Oskido, Mr Brown, Mzoe 7, Dj Eugy, K Mimi, Tamad X, Hitkid labanye abanengi.
