uMthunywa
YiNtatheli kaMthunywa
UMDLALI wakuleli uDivine Lunga usekhathele ngokusubula ibhentshi kuqembu lakhe elitsha eleMamelodi Sundowns nanko useqede imidlalo emihlanu engakwani eqenjini.
Intshantshu yomdlali le yasuka kuqembu le-Lamontville Golden Arrows ithenjiswe ukuba izathola indawo yokudlala ngaso sonke isikhathi ngoba labaqeqetshi bamaSandawana babika ukuthi lumdlali uzaphakamisa isisindo somdlalo.
Ukudlalela iSundowns kwakuvele kusehlelweni lukaLunga njalo labacuphi bomdlalo kudala bakutsho ukuthi umdlali lo uzangena kuSundowns. Abanye abadlali abasemehlweni eSundowns babalisa uNkosinathi Sibisi loNstako Neverdie Makhubela.
ULunga ngumdlali oyibamba emuva kwesenxele njalo ungomunye wabadlali abahlala besehlelweni lukamqeqetshi uSteve Komphela, ongumsekeli womqeqetshi kuSundowns.
Ucine ukudlala ngenyanga kaNcwabakazi lapho iSundowns idlala leKaizer Chiefs kumidlalo wenkezo ye-MTN 8 kuhlandla lama-quarter final.
Ekuqembu le-Golden Arrows uLunga, ubetshibilika labadlali bakuleli uDanny Phiri loKnox Mutizwa.
Umdlali lo waqala ukukhuluma ngephupho lakhe lokuyadlalela iSundowns ngesikhathi efika eSouth Africa njalo ngaleso sikhathi wayesanda kuqeda ukuzama ukukhankasela iqembu lama-Warriors kunkezo ye-Africa Cup of Nations (Afcon) e-Egypt nyakenye. Wayefunwa liqembu leTurkey kodwa i-Golden Arrows yala ngokuthi isafuna ukuthi ayidlalele.
“Ngesikhathi ngiqala ukudlala ibhola eZimbabwe ngangifuna ukuzodlala eSouth Africa. Inengi lamaqembu aphetsheya ayakwazi ukukubona nxa ulapha kulaseZimbabwe,” nguLunga lo.
