YiNtatheli kaMthunywa
UMQEQETSHI weHighlanders, uKelvin Kaindu, uvumile ukuthi abadlali bakhe badinga isikhathi sokuthi bazwisisane enkundleni ngemva kokuthi behluleke ukuhlohla bedlala leTelOne ngeSonto eBarbourfields Stadium.
UKaindu uqale ngabathathu phambili uLynoth Chikuhwa, Never Rauzhi loNqobile Ndlovu. Laba bekungokokuqala kuNdlovu loRauzhi abangene eqenjini ngesikhathi sokuthengwa kwabadlali ngoNtulikazi kuligi yeCastle Lager.
Bobathathu bebezatshintshana indawo phakathi komdlalo kodwa kwacaca ukuthi kuselomsebenzi okufanele wenziwe mayelana ngokudlala kwabo. UKaindu usebenzise bonke abagadli bakhe loBrighton Ncube ongene esigabeni sesibili.
Abadlali laba bebekhutha amathuba okuhlohla. UKaindu uvumile ukuthi kumele athole icebo elitsha.
“Asikaze sibe lesikhathi sokuthi baziqeqetshe ndawonye, uNdlovu ungene ngeSonto loRauzhi.“Asilaso isikhathi sokuziqeqetsha.
Sisazama ukukhangela ukuthi singabasebenzisa njani kodwa ngeSonto sisebenzise abagadli bethu abathathu okubuhlungu nje yikuthi asikwazanga ukukuthola ebesikufuna. “Siyathemba ukuthi ukusuka lapha sizasebenza ukubahlanganisa.
Okungcono singasebenzisa abagadli esilabo,” kutsho uKaindu. Ngesikhathi uKaindu ezama ukuthola indlela eqondileyo, uKhama Billiat uhlohle ibhola lakhe lesitshiya galolunye kulisizini ngesikhathi iYadah iphuma ngemva kokunqoba iBulawayo Chiefs enkundleni yeThe Heart ngeSonto.
Lo mdlali owake wadlalela iMamelodi Sundowns kanye leKaizer Chiefs usengumtshayi wamabhola ohamba phambili loWilliam Manondo weCAPS United, ophinde wafinyelela ku-9 ku-Green Machine behlulwa yi-Arenel Movers ngoMgqibelo.
UManondo utshaye into encomekayo ngesikhathi esondelela ukunqoba iGolden Boot, okuyisicoco acina ukusinqoba ngo-2022, ngemva kokutshaya amabhola angu-17. Kubukeka kuzaba ngumjaho onzima kubangwa iGolden Boot. Ngo-2010, umuyi uNorman Maroto watshaya amabhola angu-22 edlalela iGunners.
Abagadli abaze ngemva kwakhe behlulekile ukudlula amabhola angu-20. Umgadli weNgezi Platinum uTakunda Benhura nguye odle isihlangu segolide ngo-2023 ehlohle amabhola angu-13 kuphela. UNelson Mazivisa wasondela eduzane ehlohle angu-18 ngo-2012.
Ngomnyaka olandelayo, uTendai Ndoro laye walithola inethi izikhathi ezingu-18. Umgadli weCAPS United uDominic Chungwa laye wenze kahle ngo-2018 ngamabhola angu-17.
