uMthunywa
UMQEQETSHI wabagadli eqenjini leNgilandi, iManchester United, uBenni McCarthy, ujabule umanzi nte ngokuthwala inkezo yeCarabao Cup.
UBenni McCarthy (45) odabuka eSouth Africa wenze imbali enqoba isicoco seCarabao Cup lama “Red Devils” ngesizini yakhe yokuqala ekuthimba labaqeqetshi kuleli qembu elidlala ku-English Premiership.
I-United ibisitshove iminyaka emihlanu ingathwali inkezo. UMcCarthy ngumdlali wokuqala weSouth Africa ukunqoba isicoco esihlonitshwa kulazo zonke e-Europe, i-Uefa Champions League.
Manchester United
Usephinde wazakhela ibizo ngokuba ngowokuqala ovela eSouth Africa ukunqoba isicoco lama-Red Devils eyingxenye yethimba labaqeqetshi.
Leliqembu liqeqetshwa yinhloko yabaqeqeshi u-Erik ten Hag odabuka e-Netherlands, ofike ekuqaleni kwalisizini. Umqeqetshi lo ufike waguqula izinto kuManchester United nanko iqembu selibalelwa kwezinkulu kulisizini ngemva kweminyaka lisadalala. Kudlule phose abaqeqetshi abane besehluleka ukunqoba bekuleliqembu kodwa u-ten Hag wenze umahluko.
Kunkezo yangeSonto eyeCarabao Cup, i-United eyayicine ukunqoba isicoco ngo-2017, ihlule iNewcastle United nge 2-0, kumdlalo odlalelwe eWembley Stadium.
Omunye wabagadli abaphekwa nguMcCarthy, osehlohla nsukuzonke, uMarcus Rashford, nguye ohlohle ibhola lesibili kulumdlalo. Elokuqala livalelwe phakathi nguCarlos Casemiro.
UMcCarthy uhalaliselwe ngomunye wabaqeqetshi eSouth Africa uGavin Hunt, opheka iSuperSport United.
“Lokhu kuligugu @bennimac17. Halala ndodana,” kubhale uHunt ekhasini lakhe ku-Instagram. -Ubulembu
