Thokozile Mbedzi
KULOMPHUROFETHI wesigabeni seMakuwe eNyika ovuke esenza umsebenzi wakhe wokuphorofitha njengensukwini kukanti kabuzanga elangeni ukuba limphatheleni ilanga, nanko phela uthe esiza omunye umntwana olenyanga ezintathu zokuzalwa obelolimi olunamatheleyo waphambanisa wacina emsika isihlathi nge-razor okubangele ukuthi umntwana lo abhubhe.
Kubikwa uPrisca Bvunyenge oleminyaka engu-42 yokuzalwa usike usana lukaNokutenda Muchini oleminyaka engu-25 yokuzalwa ethi umsiza ngoba ulimi lomntwana kubikwa belunamathele phansi lungaphakami.
Ekhuluma lentatheli kaMthunywa uNkosazana Lunia Moyo oyisakhamuzi uthe behlelwe yinto ebuhlungu kakhulu esigabeni.
“Silesithuli silapha, usana ludlule emhlabeni ngendlela ebuhlungu. Unina wosana wabona ulimi lomntwana lungaphakami lungani lunamathele wasesiya kumphurofethi lo wafika wamchazela uhlupho lwakhe.
“Esemchasisele umphurofethi wamupha icebo lokuba kumele umntwana aqunywe ulimi ngendlela yena azi ngayo luyahle luphakame ngoba kumele kuhlukane iphezulu laphansi.
“Umama womntwana esezwe lokhu wathaba esesithi sethole usizo ukuba umntanakhe aphathiseke kuhlupho alalo.
“Esevumelane lalokho umphurofethi amtshele khona wahle waqala umsebenzi waquma ulimi lomntwana.
“Ekuqumeni kwakhe ulimi waphambanisa wadlulisa wasika lesihlathi umntwana wahle waqala ukopha.
“Umntwana esesopha igazi lingami umphurofethi watshela unina wosana ukuba ahambe ngekhaya engafika engamfaki i-spirit kuzazimela ukopha kodwa.
“Ukopha kwala kulokhe kusiyaphambili lanxa umama womntwana esefike laye ngekhaya.
“Lokhu kwamethusa wabuyela njalo kumphurofethi.
“Umphurofethi wasethatha amahlamvu ocucuza wazama ngazo zonke indlela ukuba igazi lime kodwa kwala,” kutsho Nkszn Moyo.
Umama womntwana wabuyela ngekhaya kodwa umntwana wabe elokhu esopha okwenza wamusa esibhedlela seSilveira Mission Hospital lapho abathi befika bephiwa umbheda umntwana wahle wedlula emhlabeni,” kulandisa uNkszn Moyo.
Isikhulumi samapholisa esabelweni seMasvingo uInspector Kudakwashe Dewa ebuzwa ngodaba lolu uvumile wathi solufikile kibo.
“Udaba lomntwana ofe ngemva kokuba esikwe nge-razor ulimi solufikile ehofisini yethu.
“Amapholisa axwayisa uzulu ukuba ngaso sonke isikhathi kangenzi izinto angazaziyo ikakhulu okuphathelane lezempilakahle ngoba zimele zenziwe ngabalolwazi lazo njalo abakuqeqetshelayo ngoba singacina silahlekelwa yimpilo mahlayana nje,” kuphetha uInsp Dewa.
