uMthunywa
Thokozile Mbedzi
KULOMAMA obotshwe kulandela ukuquma usane lwakhe olusanda kuzalwa ngengqamu, wasephosela izitho emgodleni.
Isehlakalo lesi kubikwa senzakale ngeviki edluleyo elokitshini leMucheke, edolobheni leMasvingo.
Iphephandaba likazulu lixhumane lomele isikhulumi samapholisa eMasvingo u-Assistant Inspector Lorraine Chanakira othe amapholisa aphezulu kokuchwayisisa ngodaba lolu.
“Udaba lukamama obelethe usane, ngemva kwesikhatshana walucuya solufikile ehofisini yethu.”
Ngokubika kuka-Asst Insp Chanakira, inina leli kucatshangelwa ukuthi kungenzakala ukuthi liphethwe ngumkhuhlane wengqondo.
Inina leli, uNgonidzashe Mukanhari lileminyaka engu- 22 yokuzalwa.
Umfakazi ochazele uMthunywa ngaloludaba, ohlala eMucheke uEmmely Moyo uthe uMukanhari waficwa ethwele umgodla lo, owawulezitho zomntwana.
“Silesithuli silapha njengezakhamizi. Isiga esenziwe nguNgonidzashe siyethusa. Ubelethe usane waqeda lapho waluquma quma, waphosela izitho esakeni. Kunzima,” kutsho uMoyo.
Uthe ugogo oleminyaka engu-72 yokuzalwa ohlala loMukanhari kubikwa nguye owananzelela ukuthi
kukhona okonakeleyo endlini.
“Ugogo lo wafika endlini wahlangabezwa liphunga wasebuza ukuthi kungabe kuhamba njani.
“UNgonidzashe wathi yena ukhulekile umoya obusesiswini sakhe waphuma esitsho usane.
“Omakhelwane abaseduzane bathi bephenyisisa bathola umgodla ulosane njalo luqunywe izandla lekhanda kuvalelwe ndawonye. Lokhu kwaveza sobala ukuba iphunga abantu ababelizwa lalivela emgodleni lo. Abantu baphangisa babiza amapholisa.”
U-Asst Insp Chanakira uxwayise uzulu ukuba ananzelele impilakahle lesimo sengqondo yabantu abahlala labo, ukuze kwenqatshelwe izehlakalo ezinje kusemasinyane.
“Sixwayisa abantu ukuthi bakhangelisise labo abahlala labo. Abanye baphathekile engqondweni, kungakho ngumlandu wezihlobo ukuba zincedise nxa kulodubo olunje.”