uMthunywa
Nkosilathi Sibanda
NGEVIKI edluleyo iqembu leMtshibini Young Stars lenze idili lokubonga abadlali balo ngemva kokuqeda isizini yeLupane Soccer League likunombolo yesibili.
Leli iqembu eliqeqetshwa nguPermanent Sibanda lifike lavusa ezileleyo kunguqu yemaguswini, okuyisibonelo sokuthi kwelakusasa likhona ithalenta eliphuma kulindawo elizabatshazwa izwe lonke.
Umqeqetshi lo uthe indlela abadlali bakhe abakhuze ngayo uvalo enkundleni ze-Lupane Soccer League, kuyathembisa ukuthi kuminyaka ezayo bazacina sebedlala kumaligi aphezulu.
“Siqhube kuhle kulisizini. Angeke ucabangele ukuthi iqembu elileminyaka emibili lasungulwa selihluphile. Ngibabonga kakhulu abadlali bethu, ngibonge lemuli abaphuma kizo ngokubasekela kusukela ngomdlalo wakuqala kuze kuyephetha isizini.
“Kuyinhloso yami njengomqeqetshi wabo ukuthi bengaqedi impilo zabo zenguqu bekunkundla eziphansi. Ngifuna besuke la, baye kumaqembu afana leHighlanders, Orlando Pirates laphetsheya kolwandle. Ngikutsho lokhu ngoba ngibona ubuhle bomdlalo wabo lokuthi balethuba lokuyaphambili,” kutsho uSibanda ongumhlonitshwa omkhulu kwezenguqu esabelweni seMatabeleland North.
Kubadlali bakaSibanda abaphiwe izicoco kuloMthokozisi Mahlangu obongwe ngokuba ngumdlali olekusasa elihle, uMbongiseni Mpala obengumdlali obelembeko, unozinti uEdison Maphikana, imvimbi kuzwa uButholezwe Moyo loWintson Dlamini ohlohle amabhola amanengi.
Kulumcimbi obusekelwe ngumqondisi weqembu u Letsweletse Nsimbi, kubikwe ukuba ngesizini ezayo inhloso yeqembu izakuba yikudlalela kumaligi aphezulu.
Ekhuluma lentatheli kaMthunywa eLupane, uNsimbi uthe: “Leli liqembu elisenhliziyweni yami. Ngizalisekela ngibone ukuba abadlali laba abalesiphiwo esingaka bazakuya kumaqembu aphezulu. Inhloso yethu emqoka yikuthi siphumelele siyedlala kumaligi azwayo afana lePremier League. Nxa iNkosi ivuma, sibala iminyaka imilutshwane nje.”
Amanye amaqembu akunguqu yeLupane Soccer League zintshantshu zalonyaka iLupane City, iMhlahlandlela, Invaders, Shining Stars, iHotspurs leUnited Forces.
Uluhlu lwabadlali abaphiwe izicoco:
Mthokozisi Mahlangu (Umdlali olekusasa enhle), Mbongiseni Mpala(umdlali olembeko), Butholezwe Moyo (Imvimbi), Darlington Ngwenya (osesiswini), Edson Maphikana (unozinti), Mkhululi Ndlovu, Godknows Khumalo, Winston Dlamini.
