uMthunywa
Ethel Ncube
KULENDODA yeChipale eBinga ethwele amagabha avuzayo ngokuhlala ilunywa amazwane ngamagundwane lanxa ilanga ligwaze umhlaba osekubangela ukuba lubaba ahlale egqoke amasokisi kutshisa.
Isiga lesi siqale ngenyanga ephelileyo lapho uMnumzana John Mudimba aqale ukulunywa ligundwane enyaweni ebusuku kodwa isimanga yikuthi igundwane leli selimthwalise nzima lasemini ngoba angavele ahlale phansi uyalibona selithelekile, uMthunywa ukuzwile lokhu.
Ekhuluma lentatheli omunye wezakhamizi zakule indawo uMnumzana Bernad Nleya uveze ukuba igundwane leli liyakhuluma.
“Undoda lo uselesikhathi ehlala ekhala ngegundwane, usebhodile lakubosiyazi selibehlule limluma nsuku zonke limudle angani liyagebha enyaweni.
“Kulenkulumo ngegundwane leli, abasiki bebunda bathi ubaba lo kukhona akutshontshayo komunye umuzi abanikazi basebenza igundwane alisehlukani laye. Lapho akhona angafika ahlale phansi uyalibona selithelekile selimdonsa amazwane,” kubika uMnu Nleya.
Uqhubekele phambili eveza ukuba isenzo segundwane sesicakise indoda le ikhanda nanko phela kasabuquthi ngitsho ubuthongo ebusuku.
“Icebo angalenza yikuyaxolisa lapho atshontsha khona ngoba labamelaphayo sebemzamile kodwa kuyabehlula.
“Nxa engahlala phansi egqoke amasokisi liyaluma isokisi lize libhokoke. Nxa ezama ukulibulala liyamehlula, lokhu kuchaza obala ukuba lithunyiwe, alilodwa. Ubaba lo uthi ebusuku uze avuke ahlale selimthwalele ubhulo ngokumluma amazwane kuphela. Emini lakho angahlala phansi uyalibona selikhonapho,” kuveza uMnu Nleya.
UMthunywa ukhulume loMnu Mudimba odliwa amazwane ligundwane oveze ukuba kuliqiniso ukuba uthwele nzima.
“Sekulenyanga igundwane leli liqalile ukuhluphana lami. Amazwane ami asegcwele izilonda, asengokunye. Ngiyahamba ezinyangeni kuyehlula, eyokucina inyanga ithe ngihambe ngiyelabhela lapho engathatha khona inkomo kodwa ngayibisela ngoba ngangingayitshontshanga. Yilo icebo esengisele lalo, ubuthongo angisabazi ebusuku lemini ngithwele nzima liyangidla kalidlali leligundwane,” kuphetha uMnu Mudimba.
