uMthunywa
YiNtatheli kaMthunywa
UNORMAN Mapeza uzawakhumbula amazwi abalandeli bebhola lenyawo bemcebisa ukuthi engasondeli enkambeni yeqembu leChippa United.
Umqeqetshi lo usetshiyane leqembu le-Chippa United aliqeqetshe okwenyanga ezine kuphela.
Iphephandaba likazulu lincwetshwe indlebe ngabafakazi abaqotho abase-Port Elizabeth ukuba uMapeza ucatshulwe yikuziphatha komnikazi wethimu uSiviwe “Chippa” Mpengesi.
Kodwa, angeke akhale lumqeqetshi ngoba wayesazi ukuthi la ayakhona kunzima. IChippa United edlala kuligi yeAbsa Premiership eSouth Africa liqembu elaziwa ngokuthi aligcini abadlali.
Labalandeli benguqu eMzansi lakuleli bamcebisa uMapeza ukuthi usengene ‘‘emlindini’’ ngokwamukela ukusebenzela iChippa United.
Umnikazi wayo uMpengesi, ulendumela yokuxotsha abaqeqetshi.
Ngesikhathi kuqala isizini ka2019/20, intambo yokuqeqetsha ibiphethwe nguClinton Larsen. Ngemva kwemidlalo emihlanu, waxotshwa uLarsen.
Kwaxotshwa uLarsen kwabanjiswa uDaren Francis ohlale imidlalo emibili kuphela kwathiwa akagudluke. LoManqoba Mngqithi waxotshwa ngemva kwemidlalo emibili nje kuphela eqhatshiwe.
Lo yiwo umsebenzi owesatshwa ngabaqeqetshi abanengi loba nje iChippa United iholisa imali enengi.
Omunye wabaqeqetshi bebhola eSouth Africa uphume ebulenjini esithi angeke alugxoba kuChippa United.
“Loba kungathiwa ingaphindwa katshumi imali engiyihola lapha, ngeke ngiye khona. Ngithi loba angangitshayela ucingo lamuhla athi angizoqeqetsha iqembu lakhe, uzangibhadala imali enengi, angeke ngilubhade lapho.
“Phela kwesinye isikhathi kubalulekile ukukhululeka enhliziyweni, ngakho akusizi ukujabulela ukuthi uhola kahle kodwa ekucineni uthole ukuthi awujabulanga loba usazi ukuthi ungatshengiswa indlela loba nini,” kutsho lumqeqetshi ofihle ibizo.
Umbuzo okunengi labasekeli labathandi benguqu yikuthi kungani uMpengesi wangena kumdlalo kanobhutshuzwayo nanko phela kubukeka sengathi akazi ukuthi izinto zenziwa njani ebholeni.
Mhla kuqhatshwa uMapeza, ukhona umlandeli webhola owaxhumana lohlelo lwe- Sport @10 wabika ukuthi ulusizi ngokubizwa kwalumqeqetshi eSouth Africa.
“Njengamanje sekukhona uNorman Mapeza waseZimbabwe engimfisela inhlanhla kodwa futhi ngiyazi ukuthi kukhona lapho ezatshayisana khona loMpengesi kungekudala.
“Angisona isangoma kodwa ngibona sengathi uMapeza uzasuka nje kuChippa ngoba uzasebenzela indoda engelaso lakancane isineke,” kwatsho umlandeli lo, obike ngekusasa likaMapeza ngoMfumfu.
Umlandeli lo wayiphinda kunengi eyokuthi uMpengesi kumele akujwayele ukunatha itiye labantu abadala abafana loKaizer Motaung, usihlalo weKaizer Chiefs, Irvin Khoza, usihlalo wePirates loPatrice Motsepe, umongameli weSundowns.
