Nkosilathi Sibanda
UMDLALI wamaWarriors, uPrince Dube, uziphilela impilo emnandi eqenjini lakhe elitsha iYoung Africans, nanko njalo uhlohla amabhola lula kuyo yonke imidlalo.
UDube, owazakhela udumo njengengcitshi kanobhutshuzwayo ekuHighlanders, uqhubeka ngokugaxa amabhola entanjeni, okuyikhona osekwenza wathandwa ngabalandeli bomdlalo eTanzania. Ubengomunye abahlohle amabhola, iYoung African inqoba iVital’O FC, eyeBurundi 4-0 kumdlalo weConfederation of African Football (Caf) Champions League ngoMgqibelo odluleyo.
UDube, odume kuleli ngelithi “Mgadafi” uhlohle phakathi kwemizuzu litshumi lambili kuqale umdlalo.
Umdlali lo uphinde wasukumisa abathandi bomdlalo ehlohla njalo lakumqhudelwano weTanzania Community Shield ngesikhathi iYoung African idlala leqembu ayekula ele-Azam. Ukwenzile futhi bebhekane leTS Galaxy eyeSouth Africa kulungiselelwa ukuqala kwesizini.
Ngokufika kuYoung Africans, uDube ulethemba lokuthi uzavuselela umdlalo wakhe kulandela ukudonsa isikhathi elimele eku-Azam, iqembu elalingafuni ukuthi asuke kulo ngesizini edluleyo.
Umdlali lo wathi ebika ngenyathelo lokuthi ufuna ukusuka ku-Azam, wayecabanga ukuthi isivumelwano sakhe leqembu leli siphela mhlaka 30 Nhlangula, ikanti owasalele leminyaka emibili. Kwaba lokungezwani leziphathamandla ze-Azam, okwadala ukuthi uDube engalolongi leqembu.
I-Azam yabika ukuthi ifuna i-US$300 000 ukuze imkhulule kodwa uDube wathi engasuthiseka nge-US$250 000.
Ngesizini ka2020, uDube wabangumdlali wakuleli owesithathu ukungena kuqembu le-Azam, ethengwe kuHighlanders nge-US$50 000.
