uMthunywa
USIPHO Mazibuko usenikeze amantombazana alothando lokumodela lokutayila, adabuka endaweni ezingaphandle kwamadolobho ithuba lokuthi azitshengisele kumthimba kaMiss Rural Zimbabwe.
UMazibuko, ongusaziwayo kwezokukhankasela ubuhle bamantombazana ansundu kuleli, ubikele uMthunywa kuliviki ukuba ngomnyaka ozayo, uzaphendukisa umbukiso wakhe we-Miss Zimbabwe owacina ukuqhutshwa ngo-2006.
UMazibuko usanda kusungula kakutsha omunye umkhosi wobuhle lokutayila owe-Miss Summer Strides koBulawayo.
Ekhuluma ngokuvuselela kwakhe uMiss Zimbabwe, uMazibuko uthe kukhulu okuzayo.
Kubikwa umkhosi lo uzasekela ukukhankasela isigqoko selizwe esasungulwa nguFirst Lady uAuxillia Mnangagwa.
“Ngibika ngokujabula ukuthi umkhosi kaMiss Zimbabwe usuphendukile,” nguMazibuko lo.
“Inhloso kaMiss Zimbabwe yikuphakamisa amantombazana asemaphandleni ukuze enelise ukuzimela.
“Ligcwele ithalenta lokumodela emaphandleni ngakho lidinga usekelo. Sifuna amantombazana la abeyinkanyezi yempumelelo kuziqinti abaphuma kuzo.”
Kubikwa uMiss Rural Zimbabwe uzaqhutshwa ngendlela ehlukene leyakudala ngoba andubana kwenziwe umkhosi omkhulu, isabelo sinye ngasinye sizakwenza inkundla efanayo kudingwa amatshatshazi azancintisa phezulu.
“Umkhosi kaMiss Rural Zimbabwe uvumela amantombazane asemaphandleni kuphela. Lokhu kutsho ukuba labo abangaphansi kwe-Strides Models abavunyelwa. Kusukela ezigabeni kusiya kuzabelo, ukukhethwa kwamantombazana kuzenziwa yilabo abalamachence okwenza lumsebenzi.
“Ngokunjalo, kulabantu ababili abaphethe amachence uConnie Moyo oseHarare loFaith Moyo esabelweni seMatabeleland South,” kutsho uMazibuko.
UMazibuko uthe yena lequla asebenza lalo sebenze konke ukuthi umkhosi kaMiss Rural Zimbabwe uyephambili.
Kusenjalo, uMazibuko wazise ukuthi usephume lecebo lokuthi asebenzise inkundla zokutayila ukukhankasela amalungelo alabo abaphila lomkhuhlane wengqondo.
Kungumbono wakhe ukuthi umphakathi uphiwe ulwazi ngalumkhuhlane.
