uMthunywa
YiNtatheli kaMthunywa
UMHLABELELI kaMaskandi odabuka esigabeni seNkayi oke wahlala endebeni zabantu ensukwini ezisanda kwedlula uClopas Sikhosana wethule idlalade lakhe lokuqala ngeviki ephelileyo elilesihloko esithi Kumnandi.
Umculi lo udume kunkundla zokuxhumana zeWhatsApp ngengoma yakhe yamagwadla ekhuluma ngobubi be-corona emaphandleni.
USikhosana uphathiswe nguMadlela Sikhobokhobo ukucindezela idlalade lakhe lokuqala kumaviki amabili adluleyo. USikhosana usesaziwa ngegama lokuthi Sikhosana Buhlungu.
Kudlalade lakhe leli, uSikhosana usebenzisane loJeys Marabini kanye loMadlela Sikhobokhobo, bona abenze iphupho lakhe leminyaka engu-14 edluleyo lafezeka.
Idlalade lakhe leli elitsha lilengoma ezinhlanu ezithi; Kumnandi lapho asebenzisana loMadlela, Rasta, Isomiso, Amasiko encediswa nguJeys Marabini lethi 2009.
Ingoma ezihlabe abantu umxhwele zigoqela ezithi Kumnandi, eyiyo eyamenza waziwa kanye lethi Isomiso.
Idlalade likaSikhosana lifana lesibuko umuntu angakhangela kuso abuke impilo yabantu beNkayi.
“Okwenza abantu bathande ingoma ethi Kumnandi yikuthi ikhumbuza abantu ngempilo yemaphandleni.
“Ingoma ethi Kumnandi wayibhala efuqwa yizehlakalo zempilo aseke wadlula kizo esigabeni seNkayi. Usebenzisa ingoma efanayo ukukhuthaza abantu ukuthi bangakhathazeki ngesikhathi lesi sobunzima,” kutsho uKudakwashe Takundwa omele uSikhosana.
Uphethe ngokuthi bakhangelele ukuthi nxa i-corona ingadlula benze imicimbi ezanika uSikhosana imali engcono.
