uMthunywa
Arnold Ndlovu
UMHLABELELI we-jazz olodumo elizweni usethembise abalandeli bakhe ukuthi selizavuthwa idlalade lakhe lesificamunwe munye akhangelele ukubethulela lona ngenyanga kaNcwabakazi.
Umhlabeleli lo, uMajahawodwa Ndlovu odume ngokuthi nguJeys Marabini uthe mhlaka 31 Ncwabakazi uzabe esethulela abalandeli bakhe idlalade lakhe elitsha elithi Ntunjambili elilengoma ezilitshumi eBulawayo Theatre.
Umhlabeleli lo, oseleminyaka engu-28 evuthisa inkundla zomculo we-jazz uthe wenza konke okusemandleni akhe ukuthi mhla kuphuma idlalade lakhe inkundla yeBulawayo Theatre ibe igcwele phamu abantu bezozizwela ukudla kwendlebe.
“Njengabahlabeleli bakoBulawayo sihlala sikhala ngokungasekelwa koBulawayo. Abantu bakoNtuthu abandisanga ukubuya emicimbini yethu. Njengoba ngizakwethula idlalade lami lesi-9 ngicela abantu babuye ngobunengi ukuzongisekela,” kutsho uMarabini.
Ebuzwa ukuthi idlalade lakhe likhuluma ngani uthe kangeke akuveze khathesi.
“Khathesi angifuni ukuhle ngiveze okunengi ngedlalade leli, engingakuveza yikuthi abantu kabalindele ezimnandi zodwa. Ngelanga leli ngisungula idlalade lami ngizasebenzisana labanye abahlabeleli bakoNtuthu,” kuphetha uMarabini.
