Ethel Ncube
BEKUNGABIZWA ozwayo koNdolwane, ePlumtree ngempelaviki lapho umfana osakhulayo oleminyaka elitshumi, uBamphamandla Moyo ethule imbabazane yedlalade lakhe lakuqala elitsha le-hip-hop.
UBamphamandla owazakala ngokuthi Muntu ukhiphe idlalade elitsha elithi, The Living Proof elilengoma eziyisithupha.
I-albhamu le ilengoma ezithi, I’m the Living Proof, Asifuni bangane, King of bling, Chill Nigga, Thakunathatha, lethi Trap it.
Kumcimbi wokukhitshwa kwedlalade leli, bekulabahlabeleli abadumileyo akade bezoxhasa umhlabeleli osakhulayo ababalisa uNdux Junior, Mapressa, iNsimbi zeZhwane, Acuz Pender, Zinjaziyamluma, Lover Guy, Mnyama Boys leBryan awa. Abahlabeli laba bonke bebetshaya emcimbini lo.
Intatheli ixhumane lomama kaBamphamandla uMaria Moyo obike ukuba ujabule kakhulu ngomsebenzi owenziweyo.
“Besingalali silungiselela ukuba sifeze iphupho lomntwana ukuba akhiphe i-albhamu yakhe. Umcimbi lo ubulezethekeli ezivela eSouth Africa, Botswana, Tsholotsho bonke bebuye ukubona umntwana eveza isiphiwo sakhe sokuhlabela.
“UMuntu ngenyanga kaMpalakazi uzakuyahlabela kweleBotswana kukanti leMzansi Afrika lakho bafisa ukuthi ayefika ukuze ayejabulisa abalandeli bakhe,” kubika uMoyo.
Uqhubekele phambili eveza ukubonga kumphakathi wonke owenelisa ukufika emcimbini lo.
“Ngethula isibongo esikhulu kubaculi, kuzihlobo kumaphephandala lakuye wonke umuntu owenelise ukubuya bezoxhasa umcimbi lo, lalabo abawulandela kunkundla zokuxhumana lani lizizwe libongekile kakhulu,” kuphetha uMoyo.
