uMthunywa
Thokozile Mbedzi
UMHLABELELI osakhulayo weZimdancehall, uKeith Sibanda uphakathi kokupheka idlalade lakhe lesibili elithi, Linanzelele elikhangelelwe ukuphuma embizeni ensukwini ezizayo.
UKeith (17) owaziwa ngebizo lokuthi Khizolamaak kundima yokuhlabela uqale ukuhlabela ngomnyaka ka2019 esafunda esikolo seHlathi High School.
“Ukuhlabela ngaqala ngisesikolo seHlathi High School lapho ebengiphatheka kumincintiswano etshiyeneyo. Ngiku-Form 2 kwaba lomncintiswano esikolo lapho engathi ngicula ngabona abantu bethakazelela umculo wami, lokhu kwahle kwanginika intshukutshu yokuba ngiqhubekele phambili ngomculo.
“Ngomnyaka ka2020 ngakhipha idlalade lami lakuqala elilengoma ezingu-16 ezibalisela ethi: Saving a girl child lethi Securing the next generation,” kulandisa uKeith.
Uqhubekele phambili echaza ukuthi useke waphatheka kumikhosi yakoBulawayo etshiyeneyo.
“Sengike ngaba yingxenye yemicimbi yakoBulawayo egoqela iBulawayo Arts Festival, Intwasa njalo sengike ngaba sesitikini labahlabeleli abalisa uSwizz, Tebza, De Mrekza, Junior, Bazooker lo Culture Love,” nguKeith lowo.
Uthe umsebenzi wokupheka idlalade usewenzile, osekusele yikuthi abalandeli balamukele ngezandla zombili idlalade leli elitsha.
“Ngizakhupha idlalade emalangeni alandelayo elithi Linanzelele, ngicela usekelo kuzulu. Umsebenzi suyenziwe sokusalele abalandeli ukuba bamukele ingoma eziphekwe ngobunono baphezulu.”
UKeith uthe njengoba laye wasekelwa kakhulu ngabantu abafana loSipho Mazibuko ufisa ukuphathisa abanye abasacathula ngoba umculo ungasetshenziswa ukulaya, ukukhuza ngoba uqukethe lamasiko ethu.
