uMthunywa
YiNtatheli kaMthunywa
UPETER Ndlovu usecele ukuba zonke izizalwane zakuleli zisekele umdlalo we-boxing wesifazane uKudakwashe Chivandire njengoba elungiselela ukubhekana loYemileth Mercado oweMexico kumqhudelwano weWorld Boxing Council (WBC), kuhlandla le-super-bantamweight.
Umdlalo lo uzabe useChihuahua eMexico ngoMgqibelo.
UNdlovu, owake wabangukaputeni wama-Warriors uhlangane loChivandire eSandton eSouth Africa ngesikhathi umdlalo we-boxing lo esalungisisa incwadi ykahe ye-visa.
UChivandire (26) owaziwa ngelithi “Take Money” enkundleni, wenzelwe idili elincinyane lapho yinkampani yebhizimusi lokungcwaba abantu eyeZororo Phumulani eSandton izolo ebusuku lapho uNdlovu ukhuthaze izizalwane zeZimbabwe ukuthi zisekele lumdlalo.
“Kubaluleke kakhulu ukuthi simsekele. Mhla engena enkundleni, ngiyafisa ukuthi abantu bambukele, babone ukuthi unjani,” kutsho uNdlovu.
“Umphakathi kumele ame mpo nxa esilwa, ahloniphe. Abesifazane kumele basekelwe, kukhona okuphezulu ngoChivandire. Usekelwa akutholayo, yilo kuphela esingamnikeza khona.”
UNdlovu utshele uChivandire wathi uyazigqaja ngaye ngoba utshengisele ukuthi uyazethemba.
“Dadewethu, sizakusekela futhi sifuna ukukufisela okuhle kodwa. Ngiyazi ukuthi ngesimo sakho sengqondo, njengoba sengikhulume lawe. Ngifisa sengathi ngangilaleso simo sengqondo olaso ngesikhathi ngisadlala, ngabe ngaliyisa phambili iqembu lesizwe. Ngiyazi ibhanti liyeza.”
UChivandire, owagcina isicoco sakhe seWBC se-interim super-bantamweight ngemuva kokwehlula omunye oweMexico, uZulina Munoz, eHarare ngoMfumfu odluleyo, uzabe ekhangelele ukuba ngowokuqala umdlalo weZimbabweeZimbabwe ukuphatha isicoco segolide.
