Cornelius Luphahla
KULENINA lesigabeni seSinamusanga ngaphansi kukasobhuku uSiyamunza eBinga elitshiye umthethwandaba wenduna uSamson Sinamusanga ukhuza umhlola ngemva kokunyenyisa itshamali indoda isebuthongweni.
Isiga lesi kubikwa senzakale emavikini amabili adluleyo lapho uPamudizayi Musaka engenise itshamali yakhe uSteven Muzingiri endlini yakhe yokulala.
UMusaka kubikwa usesithenjini njalo ngalelolanga umkakhe uFreddy Mudenda wayekunyanewabo.
UMthunywa ukhulumisane loMnumzana Freddy Mudenda wachaza ukuthi ubuhlungu ngoba umkakhe wanyenyisa enye indoda ekhona.
“Kwathi mhla ngilele kumkami omdala ngaphuma phandle ngisiyachitha ngezwa uMusaka exoxa lomuntu wesilisa endlini yakhe. Ngamangala ukuthi ngubani ngasengisuka ngayangena kuleyondlu ngathola kunguSteven Muzingiri kodwa wathi engibona wahle wacela ezinyweni.
“Kangizange ngikhulume lomkami ngoba ngisesaba ukuthi ngingacina ngimtshaya ngakho ekuseni ngaya bikela usobhuku kanye lenduna,” kutsho uMnu Mudenda.
Uqhubeke njalo waveza ukuthi umsolwa walivuma icala lakhe phambili komphakathi.
“UMuzingiri wathi ebuzwa ngalelicala walivuma wathi uyalazi kodwa ubeqala ukukwenza ngakho uyaxolisa,” kutsho uMnu Mugande.
Intatheli ibuye njalo yaxhumana loNkszn Musaka wafakaza ukuthi indaba le yenzakala.
“Isehlakalo lesi senzakala kodwa angikwazi sibili ukuthi ngangingenwe yini ngize ngenze ihlazo elifana laleli, kodwa sathonisiswa enduneni sahle sehlukana lo Muzingiri,” kuchaza uNkszn Pamudizayi.
Induna yakule indawo uMnu Samson Sinamusanga ibikele intatheli ukuthi umsolwa wagwetshwa ukuthi axolise uMudenda ngemali engange $400.