uMthunywa
Mthokozisi Dube
UMHLABELELI oyisizalwane seZimbabwe ohlala eUnited Kingdom, uCarole Nyakudya usekhuphe ingoma evutha amalangabi uKeep On (Bekezela).
UNyakudya uthe ingoma le ephekwe ngobunono obukhulu uyihlabelele ukukhuthaza abantu beZimbabwe ukuthi babambelele laloma isimo sisibi.
UNyakudya useleminyaka engamatshumi amabili lambili ehlala eBirmingham kodwa uthi iZimbabwe ihleli isenhliziyweni yakhe.
“Ingoma ethi Keep On ngiyihlabelele ukukhuthaza abantu bakithi. Isifiso sami yikuthi abantu babe lethemba ukuthi sizadlula kulesisimo,” kutsho uNyakudya.
Uthe selokhe wakhupha ingoma le ubethola imilayezo evela kubalaleli bomculo wakhe bembuka ngomsebenzi omuhle awenzileyo.
UNyakudya oseke wathola izicoco kwezomculo udume ngokuhlabela ingoma zokholo.
Laloba uKeep On engasiyo ngoma yokholo, uNyakudya uqinisekisile ukuthi kuqakathekile kwesinye isikhathi ukuthi abahlabeleli bafinyelele abalandeli bonke ngengoma ezikhuthazayo.
“Kuyangijabulisa kakhulu ukuzwa abantu bakhuthazeka ngomculo wami. Okungijabulisa kakhulu yikuthi labobantu bathi ibapha intshukuntshu ukuthi babambelele babe lethemba ukuthi izinto zizalunga maduzane,” kulandisa uNyakudya.
UNyakudya uphinde wagcizelela ukuthi waqakathekisa
ukuthatha isikhathi sakhe ekuhlabeleleni lingoma walungisisa lapho okwakungaba lamaphutha khona.
Uthi yena kafuni ukuthi nxa abantu belalele umculo wakhe bakholise kuphela kodwa ufisa babe lethemba.
Umhlabeleli lo uthi waqala ukuhlabela esontweni esesemncane. Waqhubeka elolonga isiphiwo sakhe sokucula waze wakhupha amadlalade omculo wokholo.
UNyakudya ngomunye wababekhona ngesikhathi kusungulwa iqembu elidumileyo iZimpraise.
“Kuyangithokozisa ukubona impumelelo yeqembu leZimpraise. Kuyisifiso sami ukuthi uNkulunkulu aqhubeke ebasebenzisa ngendlela emangalisayo,” kugcizelela uNyakudya.
Idlalade lakhe lakuqala u-This Is Now liphume ngo2005 laselilandelwa ngu-All For You ngo2008 lo Dwelling Place ngo-2015.
Isicoco aseke wasithola kwezomculo ngese-Zima Best Female Gospel Artist of the Year ngo-2015.
