Nkosilathi Sibanda
UMLOBI wengwalo zolimi lwesiNdebele uSamantha Nunu, useyethule ugwalo lwezinganekwane olutsha ngohlobo lwe-multimedia, okuyisiqalo kuleli.
UNunu, ozakhele udumo kwezokulotshwa kwengwalo kuminyaka edluleyo uhlanganise ubungcitshi bakhe kwezokuloba, wasebenzisa i-technology yakulezinsuku eqoqa ugwalo lwezinganekwane, elithi Igola leli.
Ekhuluma lephephandaba likazulu kuliviki, uNunu uthe ungumlobi othanda ukwetha inganekwane njalo uhlose ukuthuthaza abantu, ikakhulu abasakhulayo ukuthi bakhwabithe ukubala ingwalo zesiNdebele.
“Umbono wokwenza loluhlobo logwalo i-multimedia book, uvele ngothando lokuloba, ukwetha izinganekwane, ingxoxo kanye lokuthanda inguquko. Njengomlobi othanda ukwetha izinganekwane ngithakazelela umbono wokuhlanganisa amabala, imifanekiso kanye lemisindo etshiyeneyo ukuze abafundi bakholise.
“Ngokunanzelela ukuthi abantwana bayazithanda izinganekwane lengxoxo ngahle ngazi ukuthi kumele lumbono ngiwenze uphile.Ngabuye njalo ngafuqwa yikuncindezelwa lokuthengiswa kwezingwalo emigwaqweni okungekho emthemthweni osekuhlukuluze abalobi. Phezu kwalokho nginanzelele ukwehla kwesiko lokubalwa kwezingwalo osekutshiye abalobi bengela ndlela eqondileyo yokuziphilisa,” kutsho uNunu.
Uthe uzimisele ekuthini alethe utshintsho emphakathini.
“Ngokuzimisela ukuletha utshintsho, ngiqale ke ukwenza lolugwalo olungasoke lwethule indaba emnandi kuphela kodwa oluzaletha isixazululo kulezindubo. Ngale indlela abalobi sebengathola indlela ezehlukeneyo zokuthola inzuzo emsebenzini wabo. Ngalokhu ngenzela ukuthi abalobi benelise ukuziphilisa laloba kulezimpambeko lezi.
“Umbono wami yikuletha enye indlela engenza abalobi bathole inzuzo ngendlela ezitshiyeneyo ezigoqela ukuthengisa ingwalo zabo ebulenjini, kanye lokubukisa lezingwalo. Ngikholwa ukuthi lindlela ayisoke isize abalobi ekuziphiliseni kuphela kodwa izavuselela isiko lokubala izingwalo.”
Phezulu kwakho konke, uNunu uhlose ukuhuga abafundi ezikolo.
“Lindlela ngiyikhethele ukuhuga abafundi, ukwethula imibono eminengi njalo eyehlukeneyo ngasikhathi sinye, ukukhulisa izinga lokubala kanye lokutshiya abafundi bekhwabitha. Lokhu kungenze ngazama ezinye indlela zokwethula imibono njengomlobi lokweqa imingcele yokwethula imibono yokuloba, ukwetha izinganekwane lengxoxo.
“Ithemba lami yikuthi lolugwalo luzakhuthaza luvuse elinye izinga labalobi, abafundi labakhokheli ukuthi bemukele ukusa okutsha,” kutsho umlobi lo.
Uthe ekuqoqeni ugwalo lwe-multimedia usebenze lenkampani yeCandice Studios leShakes Kings. Umlobi lo uphakathi kokuqedisa olunye uqoqo lwezinganekwane olulesihloko esithi uKhulu Jack loNdevuzohlanga lapho asebenze khona lomuyi uNaison Tfwala, owabangumhleli wogwalo.
