uMthunywa
INHLANGANISO yeZimbabwe Football Association isibike ukuba kwabaliphutha ukuthi isabelo sakoBulawayo sixotshe umgcisinihlalo waso uFrancis Ntutha, ngakho kumele abuyiselwe emsebenzini.
UNtutha waxotshwa ngamalunga eZifa Bulawayo Province ekuqaleni kwenyanga kaNkwenkwezi esetheswa icala lokuhuquluza imali. Ngesizini ka-2019, uNtutha wake wamiswa umsebenzi ngenxa yokuthi waziholisa iUS$1 020 okungekho emthethweni. Kubikwa kusukela ngaleso sikhathi, iqula lakoBulawayo liyehluleka ukuhlanganisa isikhwama semali.
Kodwa phakathi kwenkemenkeme le eyadalwa nguNtutha, osabambe isikhundla sikanobhala weZifa, uXolisani Gwesela ulobe incwadi mhlaka 20 Nkwenkwezi esazisa ukuba inkokheli le ibuyiselwe emsebenzini kusaphenywa ngecala lakhe.
Zifa
UNtutha wayexotshwe loJohn Mutero.
“Sicebisa ngokuthi isinqumo sokukhitshwa kwalaba bantu kwenziwa ngaphandle kwesisekelo sombuso,” nguGwesela lo.
“Ukuze kubuyiselwe esikhundleni ilunga le-executive, udaba kumele lucaciswe ngokusobala kunhlelo zomhlangano wamalunga.
“Kulokhu, indikimba yomhlangano owawu mhlaka 30 Mabasa 2022 ayivezi ngokumiswa umsebenzi kwelunga le-executive. Siphinda seluleke ngokuthi ngaphambi kokumiswa, kwamalunga athintekileyo kufanele anikezwe isizatho sensolo ekhona. Amalunga lawo kumele anikezwe ithuba lokulalelwa ukuze azivikele.”
UGwesela uthe iZifa ayisoke ivimbe inyathelo elizathathwa ngamalunga akoBulawayo kuloludaba.
“Indaba le ivele emhlanganweni lapho obekukhulunywa ngembiko eyethulwe kumalunga. Sicela liqaphele ukuthi njengenhlanganiso, asivimbeli lakancane isabelo ukuthi sithathe lesi sinqumo kodwa sithi isinqumo asithathwe kulandelwa isisekelo sombuso.”
Uthe nxa isabelo sakoBulawayo sifuna ukuqhubeka ngophenyo kuloludaba, kumele kube lomhlangano.
“Nxa isabelo sihlose ukuqhubeka, sicebisa ukuthi kubizwe i-EGM, itsho ngokusobala udaba lokumiswa umsebenzi kanye lesisekelo sokubuyiselwa kwamalunga, ikakhulukazi labo abathintekayo.
“Njengamanje sicebisa ngokuthi asemukeli isinqumo esithethwe yisabelo njengoba kubikwa encwadini ngoba kwenziwa phandle kwesisekelo sombuso.”
