uMthunywa
Innocent Kurira
UNQOBIZITHA Masuku uthabe kazazi lapho akhona nxa ecabanga ukuthi ngempelaviki uzabe edlala leqembu elikhulu le-Orlando Pirates.
Uzizwa ebekwe phezulu lumdlali okokuthi isimphuzele ukufika impelaviki njengoba iqembu lakhe leJwaneng Galaxy lizangqikilana leBhakabhaka kumdlalo weConfederation of African Football (Caf) Champions League ngoMgqibelo.
UMasuku, owake wadlalela iHighlanders leFC Platinum kuleli, odume ngelithi “Nqola” enkundleni zikanobhutshuzwayo, uthe uyilindele iPirates njalo kethuki lutho. Umdlali lo wake wadlalela kunguqu zeChampions League ekuFC Platinum yakuleli.
“Kube lithuba elihle leli. Sengike ngadlala kulumqhudelwano njalo ngilombono wendingeko zomqhudelwano lo osezingeni eliphezulu kunguqu ye-Africa. Njengeqembu siqale kuhle amalungiselelo ethu. Sikhangele ngabomvu ukuthi mhlawumbe sidlulele esigabeni esilandelayo.
“Silomdlalo othokozisayo olandelayo lePirates, kodwa sileqembu eliqinileyo elikwazi mhlophe ukuqakatheka kokudlulela esigabeni esizalandela kulumqhudelwano,” kutsho uMasuku.
Lo ngumdlalo wesibili kulumqhudelwano wamaqembu azintshantshu zenguqu kumazwe adlala e-Africa.
Africa
Kumdlalo wakuqala, iJwaneng Galaxy yanqoba iqembu le-Vipers SC ele-Uganda nge 3-2, okudale ukuthi lenelise ukuqhubekela phambili. Izamile iVipers ukuthi igenqule iJwaneng Galaxy kwehlula, lobanje ibisondele ngokuhlohla.
Iqembu leBotswana lacina ukumelana le-Orlando Pirates ngesizini ka-2021 kusigaba sakuqala somncintiswano we-Caf Confederations Cup. Amabhakaniya anqoba umdlalo wakuqala 3-0, aphinda enza okufanayo ngokunqoba nge 1-0.
UMasuku uthe katshaywa luvalo lakancinyane nxa esizwa ngokuthi bazadlala lePirates.
“Ukuba yingxenye yeqembu leJwaneng Galaxy kube yisibusiso nanko sengilapha kunkundla zeChampions League. Wonke umuntu eqenjini ulwela ukukhethwa kuqula elizadlala ngempelaviki. Sifuna ukwenza imbali ngokunqoba leliqembu. Silekusasa elihle siliqembu, sihlangene.”
Ngaphandle kukaMasuku, abanye abadlali bakuleli abaligiqa kuJwaneng Galaxy nguCleopas Dube loDaniel Msendami.
Njengokutsho kwephephandaba likazulu ngeviki edluleyo, kubikwa bazwa ngabo laba abadlali kweleBotswana.
Ngakolunye uhlangothi, iPirates iphumelele ukuya kuChampions League kulandela ukuqeda ikunombolo yesibili kuligi yeSouth Africa. Iqembu leli lanqoba iDjabal nge 4-0 ngokugcweleyo kumdlalo odluleyo, yaphinda yanqoba iComorans nge 4-0.
