uMthunywa
Ethel Ncube
IMBONGI edumileyo esiJahundeni isiveze ukuba ifuna ukuvuselela ulimi lwesiSotho ngokuqala ukuloba ngolimi lolu.
ULerato Nqindi Ndlovu useveze ukuba ulimi lwesiSotho lusalela emuva ngoba kulutshwane okulotshwe ngalolulimi yikho efuna ukulukhulisa ulimi lolu.
Intatheli ixhumane lembongi le uLerato Nqindi Ndlovu obike ukuba useqalisile ukupheka inkondlo zesiSotho.
“Ngisekhaya khathesi angihlalanga phezu kwezandla kodwa ngiyasebenza lapha ngiloba inkondlo ngesiSotho angikaqedi kodwa sengiqalile ukuloba ibhuku leli isihloko angikaphumi laso ngizaba laso sengiqedile.
“Ulimi lolu ngifuna ukuba lukhule. Ngizabhoda lasenkonzweni ngincedise ingoma zabo zibhalwe ngolimi lwakithi ukuze lungatshabalali,” kubika uNqindi.
Uqhubekele phambili eveza ukuba abantu abanengi bamjayele ehaya inkondlo ngesiNdebele kuphela.
“Abantu abanengi bangijayele ngihaya ngesiNdebele, khathesi sengiyaqalisa ukuba nxa ngihaya lesiSotho ngingasitshiyi phandle. Ulimi lugcineka ngcono nxa lulotshwe phansi, luyahlala iminyaka njalo alutshabalali.
“Kubalandeli bami ngithi luyeza ugwalo olulenkondlo zesiSotho masinyane nje lizezwa sengilethulela, sokusele kancane ukuthi kuphutshe,” kuphetha uNqindi
