Fungai Muderere
Kangipheli moya!
YIKHO okungabe kukhulunywa nguJoel Ngodzo, okubikwa usecabange ukuphenduka enkundleni yenguqu engumdlali.
UNgodzo, odume ngelithi “Josta” engabe esetshiye umhlalaphansi nanko kuvela ukuthi ukhangelele ukuya kuqembu leZifa Southern Region Division One, iVictoria Falls Herentals City.
Ukuphenduka kwakhe emdlalweni kuzadonsa amehlo abalandeli bomdlalo ngoba uNgodzo bamazi engumdlali owayelazi ibhola ngesikhathi esakhula. Uleminyaka engu-35 yokuzalwa, okuyikhona okuzenza abalandeli labathandi bomdlalo befise ukuthi bambone ukuthi engabe elokhe esenelisa ukureyitsha njengakudala.
Ngesikhathi esukumisa abantu enkundleni, uNgodzo wadlalela iHighlanders, FC Platinum leCAPS United.
Ngesikhathi intatheli idinga ukukhuluma loNgodzo, umakhalekhukhwini wakhe ubungadojwa, kodwa abafakazi abaqotho abaseduzane kaye bathulule isifuba ngalolu daba, bebika ukuba kuliqiniso ukuthi ulubhekise esabelweni seMatabeleland North, kuqembu leVictoria Falls Herentals City.
Umdlali lo waba yiSoccer Star of the Year ngesizini ka2019. Wathatha umhlalaphansi esanda esuka kuCAPS United. Ngesikhathi esatshisa enkundleni, uJosta, wabalelwa kubadlali abalesiphiwo esinangalisayo kuleli.
Ungumnewabo wabadlali bebhola abadumileyo uJohannes loZephaniah, labo abadlalela iHighlanders.
Akumangalisi ukuthi wakhethwa njengomdlali wesibili owadlala ukwedlula bonke ngesizini ka2010.
Ukudlala kwakhe okumangalisayo akuzange kumenze ahlonitshwe kuphela kodwa wadonsa amehlo abaqeqetshi beFC Platinum. Wathengwa nge-US$60 000 ngesizini ka-2011. Kwaba yisivumelwano esihle ngoba wenelisa ukuthenga indlu eHillside koBulawayo. UJoel wadlala ngempumelelo kuCAPS United lapho anqoba khona isicoco seligi ngaphambi kokuthi athole isicoco seSoccer Star of the Year. Ungene kuCAPS United esuka kuHighlanders ngo-2015 ngesizatho sokungezwani labaqeqetshi.
KuHighlanders wadlala isizini eyodwa, wasesiya kuFC Platinum lapho owadlala khona okwamasizini amathathu. Waphindela kuHighlanders Ngesizini ka-2014, wasesiya kuGreen Machine ngo-2015.
Wadlalela iBuildcon eZambia eloDonald Teguru loTakudzwa Chimwemwe. Bobathathu batshiya iqembu leli ngokuphangisa.
Laba abadlali kayisibo abokuqala abeZimbabwe ukulahla iBuildcon nanko uNqobizitha Masuku, uDevon Chafa loPartson Jaure ngabanye abayifulathelayo iBuildcon.
