uMthunywa
Gladmore Ncube
KULENINA lakoBulawayo elokitshini leNjube elikhala ezimathosi ngodadewabo elithi walithathela indoda qede walifaka imvukuzane.
Kubikwa ukuthi uNkosazana Nomagugu Mpofu wathathela udadewabo uNkszn Zanele Mpofu umkakhe uMnumzana Dumisani Ncube qede amfake imvukuzane ukuze angaphindi futhi ambuyelele.
Intatheli ikhulumisane lomunye wezihlobo zalezi zelamani ongazange athande ukuvezwa ngegama obikele iphephandaba ukuthi indaba yasukela ekhaya laba ababili baze baqome indoda yinye.
“Inzodano le isileminyaka emibili yaqala ngoba izelemani lezi bezifungelana ngokubi ngoba babeqome ijaha linye njalo bonke lalibathembisa ukubathatha.
“Ekuthandaneni kwabo laba abantu uNcube wacina ebona kungcono ukuthi athathe lo avele wathandana laye kuqala uZanele atshiye udadewabo ekhaya ngoba laba abantu basebehlala besilwa mihla ngemihla.
“Ekumthatheni kwakhe uZanele wahle wayahlala laye koBulawayo njalo besebehlale bonke umnyaka ogcweleyo ngemva kokuthi abanjwe yimvukuzane emlenzeni osekuzwakala ukuthi wayifakwa ngudadewabo ukuze atshiyane loNcube,” kuchaza umfakazi lo oqotho.
Intatheli iludingisisile loludaba ngokujulileyo yakhulumisana loNcube othe kuliqiniso ukuthi umkakhe ubanjwe imvukuzane njalo waphinda wavuma ukuthi ihungahunga lokuthi izelamani lezi ziloyene uyalwazi.
“Ngizwa ngisizwa obunye ubuhlungu obungakhulumekiyo nxa ngisizwa ebantwini ukuthi umkami ufakwe imvukuzane ngudadewabo ukuze ehlukane lami ngiye kuye.
“Loba kuthiwa umuntu uyabe umthanda kodwa sungaze wenze udadewenu ulunya olungaka ufuna ukumthathela indoda.
“Yebo angali, iphutha lingabe lenziwa yimi elokuthi ngithandane labo bobabili kodwa lokhu akutsho ukuthi mina ngangihlose ukuthi konke lokhu kwenzakale ngoba ngiyamthanda umkami mina.
“Okungizwisa ubuhlungu yikuthi uNomagugu sathi siqala into yethu ngamtshela ngathi asisoze siyendawo ngoba mina ngizathatha udadewabo ngalokhu savumelana ukuthi singaya koBulawayo lomkami, okwami laye kuyahle kume khonapho,” kuchaza uNcube.
UMthunywa uxoxisane njalo loZanele othe yiloba wayekwazi ukuthi udadewabo wayefuna ukumthathela umkakhe ubengacabangeli ukuthi uzaze efike esimweni sokumupha isifo esingambulala.
“Bengihleli ngisazi ukuthi udadewethu uyazifela ngomkami kodwa bengingalawo umqondo wokuthi engacina engenwa ngumoya omubi kangaka owokuthi angifake imvukuzane.
“Sahluphana kakhulu esithi laye uyawufuna umendo awuthenjiswayo kodwa mina kwakungimangaza lokhu ngoba nguye owakhomba ijaha lami ekwazi ukuthi sewafika ekhaya wazovela.
“Okuhle yikuthi ebantwini engihambe kibo bathe bazangincedisa ngiphole masinya kungakabi yisilonda esixhwalileyo njalo kakhohlwe aphinde ukuthi uzafa wamthola umkami njalo lokhu angenze khona angisoze ngimphindisele, uzabonwa nguNkulunkulu wakhe,” kuchaza uZanele.
Intatheli izamile njalo ukukhulumisana loNomagugu onguye okuthiwa wafaka udadewabo imvukuzane othe kaphikisi ukuthi wake wakhomba indoda kadadewabo kodwa lokhu okwemvukuzane kalasandla kikho.
“Angali, ngake ngathandana lomkadadewethu, liqiniso lelo kodwa lokhu ukuthi ngamfaka imvukuzane angikwazi ngoba angiyazi lokuthi ifakwa njani imvukuzane yakhona leyo,” kuphetha uNomagugu.
