Langelihle Moyo
UKUBULALANA sokuphenduke insakavukela umchilo wesidwaba esabelweni seNkabazwe. Ukubulala umuntu akusabethusi abantu kibo sokulula engathi yikubulala inkukhu.
Mhlaka 1 kuyonale inyanga eNembudziya, eGokwe North esigabeni seMurozvi ngaphansi kwenduna uChireya ngehola lika-9 ebusuku u-Aleta
Tsvangirayi oleminyaka yokuzalwa engu-78 wahlahlelwa ngehloka ekhanda elele endlini yakhe ngumuntu angamaziyo wahle wafa.
Kuvezwe ukuthi umuyi wayesemzini wakhe elomalukazana wakhe uBvunzai Gandanga oleminyaka yokuzalwa engu-47. Laba ababili behlukana sebesiyalala omunye lomunye esesiya kweyakhe indlu yokulala. Bathe sebelele umalukazana wezwa umuyi ezwakala ephikisana lomunye umuntu embuza ukuthi ungene njani endlini yakhe umnyango uhluthulelwe. Umalukazana wahle waphangisa wagijima wayabiza omakhelwane, ekufikeni kwabomakhelwane bathola umuyi engasekho esimeni esihle. Umuyi ufe engakafiki esibhedlela njalo umabulala kabonakalanga.
Kusenjalo eZvishavane esigabeni seMudereri ngaphansi kwenduna uMasunda kwanyamalala uSimbarashe Moyo oleminyaka yokuzalwa engu-28 ongumtshayeli wamatekisi. Wanyamalala lemota yakhe yohlobo lweHonda Fit Hybrid.
Kubikwa mhlaka 3 kuyonale inyanga kwathokala imota kamuyi esigabeni seMudereri enxuweni lomunye umuzi. Amapholisa ahamba ayafika endaweni yakhona bathola umzimba kaSimbarashe Moyo phakathi kwemota evuza igazi emakhaleni njalo elemvimvinya emzimbeni wonke.
Ezikhwameni zakhe kwatholakala iUS$94,00 lezithupha.
Umzimba kamuyi wathwalwa wahanjiswa eZvishavane District Hospital.
Isikhulumi samapholisa enkabazwe uInspector Emmanuel Mahoko uthe ngehola lika 1 emini umabulala wabuya ehamba legqwetha ezozinikela emapholiseni.
“Mhlaka 3 emini uMaphios Mativenga weBirthday eZvishavane wazinikela emapholiseni ethi ulesandla kucala lokufa kukamuyi. Uphenyo lusaqhubeka kodwa okwaziwayo yikuthi umuyi watshaywa wabulawa ngoba ethandana lomfazi womuntu,” kuphetha uInsp Mahoko.
