uMthunywa
Bongani Ndlovu
NGEMVA kwenyanga ezintathu likhiphe idlalade le-Afro House elithi “Nyimbo za ku Africa” ijaha eliphuma elokitshini leNtumbane selithole njalo ithuba lokusebenzisana lengqwele kwezomculo i-UnderGtainment records yeSouth Africa.
UKevin Makhosi (24) waqala ezomculo ngomnyaka ka2017 ngedlalade elithi “Nimbini vol1” elalandelwa ngu-“Nyimbo za ku Africa” ngoMabasa ka2019 lapho asebenza labaculi abehlukeneyo ukuze apheke ividiyo yedlalade alikhupha ngendimi ezehlukeneyo ezaseZimbabwe.
“Kudlalade leli umculi lo usebenzisana labaculi abafana loSeagirl Novuyo kungoma ethi “Angikhoni”, abuye asebenzisane loQeqeshiwe Mntambo kungoma ethi “Me and You” kuthi ethandwa ngabanengi ethi “Motho Wa Wena.”
Ekhuluma lentatheli kaMthunywa uMakhosi uveze ukuba kuyamthokozisa ukuthola ithuba lokuba abonise isiphiwo sakhe.
“Ngithanda ukubonga i-UnderGtainment ngalelithuba abanginikeze lona ukuba ngibonise umhlaba ukuba umculo oyindimi ezimele yodwa njalo iyayakha isizwe sakoMthwakazi.
“Ngasuka eZimbabwe ukuba ngizodinga amathuba angcono ngoba kweleNingizimu kulamathuba angcono, mina umculo wami yiyo impilo yami kungakho lelithuba ngizalibamba ngezandla zombili,” nguMakhosi lowo.
Uqhubekele phambili waveza ukuba leli lithuba lokuba umhlaba uzwe umculo wakhe.
“Ithuba elinje liyinto enkulu efuna umuntu ayicabangisise kabanzi ngoba zinengi inhlanganiso esezibuyile kimi zifuna ukuba ngingene kibo.
“Okunye okujabulisayo yikuba umculo wami usulalelwa langaphandle kwelizwe emazweni afana labo Italy, Spain laseUK okuveza ukuba umuntu angasebenza nzima engazibona lezondawo ngomculo.
Uphethe ngokulimukisa abaculi bakuleli ukuba baqhubeke besebenza nzima ngoba bengazi ukuthi ikusasa libaphatheleni.
“Kusukela khathesi akusekho ukuphumula ngoba sekumele ngenze ibizo njalo ngibonise ukuba angizanga ukuzodlala emsebenzini ngoba kuyinto ethokozisa umoya wami,” kuphetha uMakhosi.
“Ngizathanda lokulimukisa abaculi abasakhula ukuba kabaqinisele besenza izinto ngendlela ngoba ikusasa lingelamnikazi,” kuphetha uMakhosi.
