uMthunywa
YiNtatheli kaMthunywa
UMSEKELI kaMphathintambo obona ngeZabatsha, Ezemidlalo, Ezobuciko kanye leZokuzithokozisa uTinoda Machakaire ubambisane lesikhulu esiphezulu seNyaradzo Funeral Service uDokotela Philip Mataranyika ukubhadala zonke indleko zomngcwabo kamuyi umahlekisa uLazarus Boora obesaziwa kakhulu ngokuthi nguGringo.
Umahlekisa lo, ubhubhe ngemva kokulwisa imvukuzane yesisu eWestview Clinic eZimre Park.
UGringo ubekwa lamuhla emzini wakhe esiqintini seRukweza eRusape.
UMachakaire ophinda abe yisitshayamthetho sebandla leZanu PF eWedza South uthe kubalulekile ukuma lalabo abakhalayo njalo ubonge uDkt Mataranyika ngokuphathisa.
“Indleko zonke zomngcwabo sezibhadelwe, ngoba sesibhadele ukudla, ibhokisi, imota zokuya ekhaya eRukweza.
Sibone kufanele njalo ukuthi sithenge inkomo,” kutsho yena.
Uthe uHulumende uzadlala indima yakhe kusetshenziswa ugatsha lwakhe ukuthi umlingisi lo avaleliswe ngendlela elesithunzi.
Ukungenela kukaMachakaire kanye loMataranyika kufike ngesikhathi esifaneleyo kumuli yakoGringo.
Unkosikazi kaGringo, uNetsai Meki uthe usizo lolu selwethuliwe emulini.
“Sesibikelwe njengemuli njalo siyabonga ngesenzo lesi. Lokhu kusethule umthwalo omkhulu ngoba besingelalutho,” kutsho yena.
UDokotela Johannes Marisa obeselapha umlingisi lo, uthe udabukile ngokudlula kukaGringo ngoba ubelethemba lokuthi uzasila.
UMqondisi weNational Arts Council of Zimbabwe (NACZ), uNicholas Moyo, uchaze uGringo njengomhlobo ongajwayelekanga wabomahlekisa owaduma kuZBCtv ngomnyaka ka1997 ngomdlalo othi Gringo andubana abonakale kweminye imidlalo ebalisa u“Gringo Ndiani?” kanye lo “Gringo Mari Iripi?”
Uke njalo wabonakala komunye umdlalo othi “Village Secrets” engu “Gibbo”. Utshiye abantwana abayisikhombisa lonkosikazi uNetsai.
