uMthunywa
Thokozile Mbedzi
KULENDODA yesigabeni seChitova eTriangle okubikwa iqede insuku ezine ihlukuluza unkosikazi wayo ngokumbhaxabula ngogodo ngoba ifuna imali eyamgcinisa yona.
Kuvele ukuba uEria Mbulawa oleminyaka engu-32 wavumelana lomkakhe uDudzayi Nyakufema ukuthi bagcine imali engangeUS$250 yokuthenga inkomo kodwa uMbulawa wabuya esefuna leyomali ukuze ayenika umakhwapheni wakhe, unkosikazi wala okuyikho okwabangela ukuqala kwempi emzini wabo.
Kubikwa uMbulawa waqala ukutshaya umkakhe ethi kamnike leyo mali kodwa wala waze waya laye ngakibo ethi kafuni lemali yakhe.
Unkosikazi wakhe wafunga wagomela ukuthi ngeke amnike imali abayihlanganise nzima kukanti umkakhe wayelokhu emtshaya elethemba lokuba uzacina emnika imali.
Ababili laba babuyela emzini wabo uMbulawa laye elokhu emhlukuluza ngamandla unkosikazi wakhe efuna aze akhiphe imali kodwa kwehlula wakhetha ukuthi adle umuthi wokufafaza utshinda wafa.
Kubikwa unina kaMbulawa wafika emzini wabo ezobakhangela wafika wangaboni umalukazana wakhe wayabikela ipholisa lesigaba lalo elahamba layamkhangela lamswela.
Kwezwakala ukuba uye kwesinye isiqinti lapho athi esebonakele wasetshayela unina ucingo emtshela ukuthi umkakhe usendlini yabo yokulala unathe itshefu.
Isikhulumi samapholisa esabelweni seMasvingo uAssistant Inspector Lorraine Ndlovu ebuzwa ngodaba lolu uvumile wathi solufikile kibo.
“Sidingisisa ngodaba lwenye indoda etshaye umkayo ngogodo ifuna imali akade beyigcinele ukuthenga inkomo okwensuku ezine waze wanatha itshefu.
“Isidumbu sithwalelwe esibhedlela seChiredzi General Hospital ukuze siyehlolwa.
“Amapholisa aqhubekela phambili ngokuphenyisisa ngodaba lolu,” kuphetha uAsst Insp Ndlovu.
