uMthunywa
UMARVELOUS Nakamba osedlala ibhola lenyawo kuqembu leAston Villa eNgilandi ukhuthaze abasakhulayo kulumdlalo ukuthi balandele inyathelo lakhe nxa befuna ukuyalikhaba phetsheya.
Umdlali lo ubikele abalandeli beqembu lakhe elitsha ukuthi ukuzadlala ekhumbula inengi labadlali abacathulayo ukuze abanikeze ithemba lokuthi bengafana laye kumbe benze ngcono.
UNakamba wenze udumo ngokusuka kuligi yeNgilandi esuka kwele-Belgium kuqembu leCircle Brugge ngoba usebalelwa kubadlali abadabuka kuleli asebathola inhlonipho kuligi elandelwa ngabanengi umhlaba wonke.
Umdlali lo, owakhulela koBulawayo, uselodumo olulakho ukwedlula oluka-Peter “Nsukuzonke” Ndlovu loBenjani Mwaruwari labo abadlala eNgilandi badla ubhedu.
UNakamba uleminyaka engamatshumi amabili lanhlanu yokuzalwa njalo ufike eNgilandi ngemva kweminyaka eyisitshiya galombili kwacina ukuba lomdlali weZimbabwe kulelo.
Ngokufika kwakhe eNgilandi, uNakamba usebatshazwa njengomdlali ozakholisisa abalandeli be-Aston Villa. Amaphephandaba asedolobheni leBirmingham abika ukuthi uNakamba usezatshintsha umdlalo we-Aston Villa.
Ekhuluma lomsakazo weBBC Sport kuliviki uNakamba uthe ukuba khona kwakhe eNgilandi kuzasukumisa ithalenta labasakhulayo.
“Kuyinto enhle kwelakithi ukuthi ngidlalele lapha, ngimele isizwe sakithi. Kuhle ikakhulu kwabasakhulayo abasekhaya,” kutsho uNakamba.
“Kungumbono wami ukuthi abasakhulayo bazakholwa ukuthi akulanto engabehlula.”
Ubike ukuba kusesemasinyane ukuthi kukhulunywe ngekusasa yakhe e-Aston Villa.
“Ngumnyaka wami wakuqala la, ngisazama ukuhlaliseka, ngifunde ukuze ngenelise ukuthi ngidlale.”
