uMthunywa
Langelihle Moyo
KULEXHEGU leMasvingo elileminyaka engu-81 yokuzalwa eligongodwe ngamatshe lafa ngujaha ogula ingqondo oleminyaka engu-19 yokuzalwa.
Kubikwa mhlaka 11 kuyonale inyanga uGirison Chivasa wesiqintini seDzimati ngaphansi kukasobhuku uMatsveru koChivi wayekwejisile lomkakhe uBerita Mawarire oleminyaka yokuzalwa engu-70 aze akhandwe ngamatshe ngumzukulu wakhe.
Kuzwakale ukuthi ngehola lesifica minwe mibili ntambama, umzukulu kaGirison uTafadzwa Chivasa (19) wezwakala esithi uzwa kusithi abulale umuntu ngapha egijigijima indawana yonke esenza ubudlwangudlwangu.
Khonokho uTafadzwa wadobha amatshe waqalisa ukukhanda ngawo uyisemkhulu uGirison waze wawela phansi ehlaba umkhosi ecela ukuthi uMawarire aphangise ayebiza omakhelwane bazomlamulela.
Umfanekiso uthethwe ku Shutterstock
UMthunywa ubuye wezwa ukuthi ekuphendukeni kukaMawarire evela biza omakhelwane wathola uGirison esethe daca phakathi kwesiziba segazi, ngapha uTafadzwa emile ebambe insimbi efunga esithi ozake asondele phansi kwakhe uzambulala. Kubikwa bamekela waze wasuka wangena igusu basebesiyabikela amaphola abuya abopha uTafadzwa.
Isikhulumi samapholisa esabelweni seMasvingo uInspector Kudakwashe Dhewa uthe isehlakalo lesi somzukulu obulele uyisemkhulu senzakala mhlaka 11 kuyonale inyanga njalo isidumbu sahle sathwalwa sasiwa esibhedlela seChivi District Hospital.
Uthe uTafadzwa Chivasa (19) ugula umkhuhlane wengqondo.
Uphethe ngokuxwayisa uzulu ukuthi nxa abantu behlala lomuntu ongaphilanga kuhle engqondweni bamuse esibhedlela masinya ukuze athole usizo.
“Njengamapholisa sithanda ukuxwayisa uzulu ukuthi nxa lihlala labantu abagula ingqondo lingabagcini emakhaya, libaphangisele libahambise esibhedlela ukuze bathole imithi masinya engabasiza,” kuphetha uInsp Dhewa.
