Uncategorized

UMzoe 7 uhlanyiswa yiBosso

23 May, 2024 - 00:05 0 Views
UMzoe 7  uhlanyiswa  yiBosso Mzoe 7

uMthunywa

Langelihle Moyo

BAQINISILE nxa besithi ubuhle be-Bosso ngabalandeli bayo, nanko lomculi wodumo uMzoe 7 useveze uthando lwakhe ngeqembu kungoma yakhe entsha.

Ingoma le, ethi Tshilamoya isilevidiyo ezakwethulwa emphakathini ngoLwesihlanu.

Kulingoma usebenze lomunye umculi wakoBulawayo uThandie Dhlana. 

Ekhuluma lentatheli kaMthunywa uMzoe 7 uthe ingoma le engoyokubungaza iqembu leBosso, iqembu elithakazelelwa lokulandelwa ngabantu abanengi.

“Inhloso yethu ngengoma yikuthakazelela iqembu le-Bosso, labo bonke abadlali abasikholisisayo ekukhuleni kwethu. Ngitsho njalo ngoba ngikhulele eNtumbane, indlu yangakithi yayisendleleni lapho abantu ababedlula khona besiya ebholeni, lapho engangibezwa behlabelela ingoma zenjabulo behaya iqembu leli, lathi size sicine sihlabela labo sithokoza lokujabula labo. 

“Kwesinye isikhathi sasisizwa nxa iBosso isihlohlile simemeze amabizo abadlali sijabula ngakho-ke, sifuna lathi abanye babekwazi ukuthi ngobani ababedlalela iBosso ngezikhathi zethu. Lami kunje kukhona abanye abadlali engisafisa ukuhlangana labo abagoqela uTapuwa Kapini, Thulani Biya Ncube, Johannes Ngodzo, Madinda Ndlovu, loMabaleka,” kutsho uMzoe 7.

Uthe yena usengumlandeli weqembu okwedluleleyo, ngoba uyalithanda kakhulu iqembu leli, seliyingxenye yemuli yakhe. 

Wengeze ngokwethula inhlonipho kwabanye abahlabela ingoma ngeqembu le-Bosso, abagoqela uLovemore Majaivana, Stanley Nyathi, Sisasenkosi, Zex Manatsa loKhuxman.

“Iphupho lami yikuthi lami ngolunye usuku ngihlabelele iqembu lidlala enkundleni phambi kwabalandeli, ngitshengise uthando engilalo eqenjini le-Bosso,” kutsho uMzoe 7.

 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds