uMthunywa
Wayne Ncube
UMHLABELELI wakuleli osakhulayo we-kwaito owaziwa ngokuthi uMzistozz usekhuphe idlalade elitsha lokukhuthaza intsha ukuba ingekeli ukuya esikolo ngengoma yakhe ethi Dadewethu.
UMzistozz ogama lakhe lokuzalwa nguMzingaye Ncube uxwayise abalandeli ngengoma yakhe entsha elemfundiso ngesikhathi sekhefu leKhisimusi.
UMzistozz uke waba senkundleni encedisa uTebza kungoma yakhe ethandwa yintsha ethi Waz’khoth’ilihlo.
Ngengoma le uMzistozz utshengisa abatsha ukuqakatheka kwesikolo kanye lokuthi kunengi okuhle intsha engakwenza emhlabeni kulokutshaphaza impilo zabo.
“U-Dadewethu yingoma engiyiphekele ikakhulu umnawami oyintombi ofunda uForm 1 kanye lezinye izintombi ngaphandle ukuthi impilo iyisiphiwo esihle njalo kukibo ukuthi bafuna ukuyiphatha njani.
“Omalayitsha lenjiva bebelapha ngesikhathi sekhefu njalo intsha enengi iyahugwa yimali ngoba bethengelwa lokhu lalokhuyana.
“Kuthi ngesikhathi sebevula amehlo ukuthi impilo leyo kayibasi ndawo kuyabe sokonakele ngakho ngengoma le ngithanda ukuxwayisa abalandeli bami ngezingozi ezifana lale,” kuchaza uMzistozz.
UMzistozz uphethe ngokuthi ama-vuzu, izidakamizwa kanye lama-blesser sekujwayelekile kwabasakhulayo ngoba bezama ukulingisela impilo abayibona kumabonakude kodwa kungoma yami le ngibatshela ukuthi lokhu kuyedlula njalo akula kusasa.
