uMthunywa
NGEVIKI edluleyo sitshiye abathathu sebenze wonke amalungiselelo okuqhubeka ngohambo lwabo njalo sebenze wonke amalungiselelo okuhlangana lesitha, sebelungise wonke amalungiselelo ngalokho ababekucabangela ukuthi babengahlangana lakho endleleni.
Sebedlile basutha sebezizwa labo ukuthi basebeqinile uSimilo wayidumela njalo yangena indlela isidla amalahle.
Balandela indlela eyayisekela izintaba.
Indlela yayicicima okwamagama amazolo eyicecise ngendlela yemvelo, kulapho-ke uSimilo ananzelela khona ukuthi indlela le ababehamba ngayo yayisithanda ukumphica laye, wayeselahlekile, babephakathi kwezintaba ezazilamadwala ayengathi alengele emoyeni.
Akula ngitsho loyedwa owaphendula uSimilo ngendaba yokulahleka kwabo.
Ngaleso sikhathi uSethekele wayesethule zwi sethe sece enqulwini kaMzila kwazise wayelokhu esidla amathambo engqondo kakhulu okwakuqhubeka ngaphakathi kwakhe.
Imota yabo yawaqansa amaqaqa, yaqansa lezintaba isizwakala nje ngokuhuba ibuye njalo ihodoze, umtshayeli wayo kwasekusobala nje ukuthi yindoda elesibindi.
Sinanzelela ubunzima asehlangene labo emgwaqweni lapha kodwa-ke kazange atshengise inhliziyo yokukhalala loba eyokudela, okunye okusichazela kabanzi ngesimilo sakhe njengoba nje lebizo lakhe lichaza ukuthi Similo.
Kazange alahle inkombalanga yakhe kanye lenkomba ndawo okuyiyo njalo eyabanika ithemba ngoba yavele nje yakhomba ukuthi babengalahlekanga kakhulu.
USimilo wabuye wabakhumbuza njalo ukuthi bangaze balibala uhambo lwabo, ukuthi lapho bahlangana labebutho bangaze balibala ukuthi babesiya esibhedlela seBrunabhegi lapho ababehambela udaba lwabo lokutshiywa ngabantwana.
Siyananzelela njalo ukuthi isikhathi sempi lesi sasidinga abantu abalomcabango okhaliphileyo abenelisa ukuphuma lamaqhinga okuphepha ngezikhathi ezifana lalezi, kwakungadingakali umuntu omsulwa, iziwula zazibhubha.
Dukuduku bazithela phezu kwebhakane elaliqukethe umbiko wokuthi indawo leyo yayingahanjwa kusukela ngehola lesine ntambama kusiya kweletshumi ekuseni.
Yayinzima indawo yakhona njengoba kwakugcizelelwa lokuthi owayezabonakala esephula leso sixwayiso wayeza dutshulwa.
Pho basebezayithini indaba enje njengoba basebephakathi kwendawo le ngemota ngesikhathi esingafanelanga.
Kwakuthi besathi nje bayazinza ngelithi uhambo lwaseluzaqhubekela phambili kuvele njalo olunye udaba olusindayo.
Uhambo lwabo lwalunzima lwalusinda, yayingalula indlela eyahanjwa nguMzilakawulandelwa.
