Umzila kawulandelwa

28 Feb, 2019 - 00:02 0 Views
Umzila kawulandelwa

uMthunywa

SIQHUBEKA ngohambo olungaziwayo olwaluthethwe nguMzila kanye lalaba ababili angabaziyo ayevele engazi lokuthi inhloso yabo kwakuyini.

Sicine ngeviki edlulileyo sekunzima endleleni lapha sebephambana lenhlamvu zombhobho kuvutha lamalangabi omlilo.

Imota yakhona yayisihlanhlatha ngokuzindledlana okuncinyane, yayikhutha kancane nje ukuthi igqikilane lezihlahla okusobala nje lokuthi umtshayeli wayo wayeqeqetsheke kwavuma kwezokutshayela lapha.

Kwathi ke sebehambe umango othile besuka endaweni eyayilavuka amabhomba yabuya njalo yathula yathi ntsi imota le, umtshayeli wehla lesigubhu samafutha wafika wayinathisa, wabuya njalo wahlolahlola indlela lephandle nje, kulapho ke aphenduka emoteni lapha esebambe umhlolo.

Wawubabaza owesabekayo lapho umongikazi kanye loMzila labo bethuka baphosa bazidela bezibuza nje ngaphakathi ukuthi kanti pho umhlolo lo okwasekukhulunywa ngawo ngumhlolo owawusuvela ngaphi njalo kungumhlolo bani lowo.

Ekuhlaleni kwakhe esihlalweni somtshayeli kulapho azwakala khona esebiza umongikazi lo ngebizo elahle lathi bha engqondweni kaMzila.

Umongikazi lo ayemfanise esibhedlela emfanisa lonkosikazi wakhe kwakunguye mpela uSethekele wakhe.

Okunengi konke kwakukhona kusithi dlwe engqondweni yakhe, ngempela kwakuyisithandwa sakhe lesi ayengasazi ngitsho lokuthi uzabuya ahlangane laso empilweni.

Kusobala amaqhinga ayesevala amehlo akhe kwakungamaqhinga kaSethekele konke ayekwenza wayekwenzela ukusiza umphefumulo wesithandwa sakhe.

Indaba eyayisibaxakile laba bobathathu basebelahlekile endleleni lapha basebehambe umango omude okwamagama ngendlela engayisiyo.

Kwasekunzima ke ukuyixazulula indaba le amafutha emota lawo ayefuna ukusetshenziswa ngonanzelelo ukuze aphutshe uhambo lolu.

Ngapha kwasekuzakusa kwazise kwakuzaba yingozi enkulu ukuqhubeka ngohambo lolu ekukhanyeni abantu laba babezingelwa okwamagama ikakhulu ababesuke bekwenzile esibhedlela ngamafitshane nje basebevele bekuyikudla kwamanqe.

USimilo wayichaza indaba yokuthi kwakuzanywa ukusiza uMzila lo owayesephakathi kobunzima evele esezulelwa ngamanqe esibhedlela ayekuso.

Wabuye njalo wawatsho amagama okuqinisana lapho esithi uMzila ke yena wayevele ejayele ubunzima empilweni yakhe wabuye waqinisa ngelithi kwakuzamele afe ukufa kweqhawe hatshi ukufa kwegwala lapha kwase kumele iqhawe life lizendlalele okusobala nje ukuthi kwasekumele kuthathwe amanyathela asindayo ukuze uhambo lolu luphutshe.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds