uMthunywa
SIQHUBEKA ngodaba lwethu, lapho esatshiya khona uMzila ebambe owangaphansi laye engasakwazi ukuthi kuyini okwakuthatha indawo, wayesamangaliswe layindoda le eyayithe yaqhamuka phambi kwabo lapha.
Ngokuphazima kwelihlo wazibona esesezandleni zendoda le eyayithe yavumbuluka phambi kwabo.
Kwaba njalo yileyo ndoda eyasusa imota yayo ngesiqubu esimangalisayo.
Yayisingene umgwaqwana olukhonjwana yadla amalahle, kwazi bani pho ukuthi amabombo yayiwabhekise kuphi.
Yayiphapha phakathi kwezihlahla kanye lezihlahlana uMzila laye aze azwe amathumbu akhe esesukuma, kwezinye indawo yayiphakama amavili anganxanye isale kancinyane ukuthi imota ibhewuke, laye wayezibona esezebanjwa ngumongikazi njengoba babehlezi bonke emuva lapha.
Kwakusobala-ke ukuthi kukhona okwakubalekelwa lapha.
Yayiphapha imota le besizwa nje ngokutsheka kwevili ukuthi basebesendaweni elamatshe, kumbe uzwe igaya itshebetshebe ukuthi lapha yayisisebhuqwini.
Uhambo lwabo lwalulude, besephakathi kohambo lolu wezwa nje umtshayeli wemota eyiqobotsha isithi nje ntsi, wananzelela umtshayeli owaphuma enyenya.
Masinyazana nje yayisiphendukile leyo ndoda yafika njalo yangena yayidumisa yasuka ngesiqubu esivuthayo kwabasobala ukuthi indoda yayisiya hlola umumo emgwaqweni ukuze uhambo luqhubeke, lokhu wakunanzelela sebeqe umgwaqo obanzi sibili.
Ukukhanya lakho kwasekuvela kancinyane lamathunzi eseqala ukubonakala lawo. Indonsakusa layo yayisiqala ukubonakala phezu kwezihlahla.
Emoteni lapha inkukhu yayiqunywe umlomo, kwakungela muntu owayekhuluma, kwakuthule zwi.
Bathi nje sebehambe umango thile bezwa umdumo ongajayelekanga ngemva kwabo lapha bethalaza babona amalangabi abomvu gebhu.
Phambi kwabo kwavela amalahle enhlamvu ayelavuka phezu kwabo, ezinye inhlamvu zazintweza phezu kwemota kusobala nje ukuthi zazifuna ukuba cacada amakhanda. Umtshayeli wemota wenza okokuyiqobotshwa imota le wathula zwi loba nje umongikazi loMzila basebeqhuqha sebengumhlanga.
Masinyazana njalo imota le yabuya yatshibilikiswa sekungathi yayitshayelwa ngumuntu owayesuthi amabele.
Uvalo lwaselubusa ezifubeni zabantu lapha.Wayezama ngazo zonke indlela ukuvika inhlamvu lezi umtshayeli loba nje kwasekusobala ukuthi indlela yayisithanda ukuba nzima.
