Nomthandazo Ndlovu
KULENINA elileminyaka engamatshumi amathathu elimiswe emthethwandaba weTredgold koBulawayo kuviki ephelileyo lisetheswa icala lokutshontsha umakhalekhukhwini womunye umbalisi wamtshwathika empahleni yakhe yangaphakathi emhlanganweni.
Inkundla izwe ukuthi mhlaka 12 Zibandlela eMcKeurtan Primary School umetheswacala uPriviledge Phiri ohlala elokitshini leLobengula West watshontsha umakhalekhukhwini kaNkosazana Chandipamwari Ndiripo ongumbalisi wesikolo lesi.
Kubikwa lelolanga umbalisi ongumamangala wayenxuse abazali emhlanganweni ngakho umetheswacala wananzelela ukuthi umbalisi wayetshiye umakhalekhukhwini wakhe phezulu kwetafula esaxoxisana labanye abazali wamtshwathika kumpahla yakhe yangaphansi wadla phansi.
Umamangala ebona ukuthi umakhalekhukhwini wakhe semile inyawo waqala ukumdinga. Esemswele wayabikela abakoGtel lapho ayethenge khona abafika bamtshengisa iphepha lokusetshenziswa kukamakhalekhukhwini lo okuyikho okwavela inombolo zocingo zikaPhiri okutshengisa ukuthi nguye owayesemsebenzisa.
Ebona lokhu umamangala wagijimela emapholiseni lapho afika wamangala khona okwabangela ukuthi umetheswacala abotshwe.
Emthethwandaba umetheswacala kazange alandule ukuthi walenza icala leli wabika ukuthi wayezama ukugcina abantwana bakhe abane.
Ngemva kokulalela icala leli, umantshi uMnumzana Franklin Mkhwananzi uqume ukuthi umetheswacala ahlawule amadola angamatshumi ayisithupha ($60) kumbe avalelwe ejele okwamalanga alitshumi.
Umtshutshisi kulelicala bekunguMnumzana Maclean Ndlovu.