UMvulo obomvu kwekaMatshobana . . . Kungaba ngovela eNgilandi, eZambia kumbe eSpain

19 Sep, 2019 - 00:09 0 Views
UMvulo obomvu kwekaMatshobana . . . Kungaba ngovela eNgilandi, eZambia kumbe eSpain

uMthunywa

Nkosilathi Sibanda

UMQEQETSHI omutsha weHighlanders uzavezwa ebantwini ngoMvulo ngakho abalandeli labathandi baleliqembu abalinde iviki ezayo ukuze bazibonele mathupha, kutsho iqula lenkokheli zeqembu.

IBosso ithole umqeqetshi omutsha kulandela ukudinga umhlaba wonke, kuphendlwa lakumaligi aseSpain, eMelika, eNgilandi laseZambia.

Ukungenzi kuhle kweqembu, lisehluleka ukunqoba, kudale ukuthi kube lesivumelwano sokuthi akudingwe “izandla ezingcono” ukuze kube lempumela kwekaMatshobana.

Ithimu yezwe lonke, ngokuzwa kwephephandaba likazulu kubafakazi abaqotho ikhulumisane lehlekana labaqeqetshi njalo kubikwa banengi abafisa ukuza koBulawayo kuleliqembu.

Kube ludaba olusegudwini kumaviki amabili adluleyo ukuthi iqembu leli lizaxotsha uMandla Mpofu kungene lo omutsha, kodwa abadala bethimu bathe uMpofu kasoke axotshwe.

“UMandla kayindawo. Sikhumbuzane ukuthi isikhathi sonke lesi ubesabambe isikhundla sikamqeqetshi, yena ungumsekeli njalo uzaqhubeka engumsekeli kamqeqetshi ozaqhatshwa,” kutsho umfakazi osemahofisini eBosso.

UMthunywa uphange waxhumana lomgcinisihlalo weHighlanders uKenneth Mhlophe othe akalawo amanengi amazwi ngaphandle kokuthi akulindwe elangoMvulo.

“Yebo, liqiniso sibili ukuthi sesimtholile umqeqetshi omutsha. Ibizo lakhe lokuthi uvela ngaphi, okwamanje angeke sikuveze. Kodwa-ke, ithimu yezwe lonke izabika, iveze lumqeqetshi phambili kwamalunga wonke labathandi beqembu ngoMvulo.

“Iqembu lidinga ukunqoba ngakho sithi asiqhubekeni silethemba lokuthi lo ozayo umqeqetshi uzayiphakamisa ithimu,” kutsho uMhlophe esecingweni ngoLwesithathu ekuseni.

Kumabizo abaqeqetshi abesemlonyeni yabanengi kubaliswa uMark Harrison ekuqaleni ngenxa yokuthi uvela eNgilandi. Kwezinye inhlangothi kuvezwa uBruce Grobbelaar, abanye bathi nguKelvin Kaindu weZambia owake wayiqeqetsha iTshilamoya, uDesmond Donaldson Bulpin laye usegudwini.

UBulpin lo waphosa wabuya kuBosso ngesizini edluleyo kumele aqalele uMadinda Ndlovu. Lo nguye umqeqetshi owayesethenjiwe ukuthi uzabaphakamisa eMagumeni.

Ebuzwa ngalumqeqetshi, uMhlophe uthe: “Asibambeni lona lelo elokuthi silinde iviki ezayo.”

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds