UPITSO Mosimane, oqeqetsha iMamelodi Sundowns, udlala umaphicana nxa ebuzwa ngokubuya kuka-Knowledge Musona kuqembu lakhe.
Abafana bakaMosimane banciphise isikhala phakathi kwabo leKaizer Chiefs esesiqongweni behlula AmaZulu FC koweligi eMoses Mabhida Stadium, eThekwini, ngoMgqibelo ebusuku.
“Bafowethu liyithathaphi lendaba kaMusona?” kubuza uMosimane ezama ukuphica intatheli.
“Lakanjani! Akubuzwa lokho. Ungamyekelani? Nxa etholakala, ungamyekelani? Ungumhlobo womdlali engimaziyo ukuthi uzokuhlohlela amabhola. Uyalwa. Ufana loKhama Billiat, uqinile futhi ulomqondo, njalo usesimeni esihle. Uma etholakala impela, ngingathanda ukuba laye.”
UMusona njengamanje usemabhukwini e-Anderlecht yaseBelgium. Kuleli qembu ufike ngoNtulikazi 2019 esuka kuKV Oostende yakulo leliya lizwe.
Manengi amathuba okuthi agcine ethelekile kuSundowns kwazise imali ngeke ibe yinkinga kanti kulabanye abadlali labosaziwayo beZimbabwe abangamkhulumela ekutheni athole inkontileka.
UPeter Ndlovu lo-Esrom Nyandoro bengakwenza lokhu.
“Sibe lenhlanhla encane ukuthi siphange sihlohle amabhola okutshintshe isimo somdlalo. Kulemidlalo edlule sidlala laMaZulu, abezimisela ngokusivala emuva kodwa ngoba siphangise sahlohla, baphendule ngokufuna ukubuyisa induku. Kujwayelekile lokho. Baqale basihlasela okwenze bavuleka,” kutsho uMosimane.
Ukunqoba kweSundowns ngoMgqibelo kunciphise isikhala semiklomelo phakathi kwayo leChiefs saba ngamaphuzu amane. Impofana ihlulwe yiSuperSport United nge 2-1 eMbombela.