uMthunywa
Nkosilathi Sibanda
IMVIMBI kuzwa kumdlalo kanobhutshuzwayo uPeter Muduhwa wehlulekile ukuthi angene kuhlelo lweqembu leUD do Songo kungakho usekhethe ukuthi engeze isivumelwano sakhe leHighlanders.
UMuduhwa ubesekhangelelwe ukuthi ayetshibilikela kweleMozambique ekuqaleni komnyaka ozayo. Imizamo yokuthi athabise abacuphi bethalenta ku-UD do Songo yehlule kumaviki ambalwa adluleyo. Umdlali lo katshayi inja efihla umphini ngoba wakubika kudala ukuthi ufuna ukusuka kuHighlanders.
Ekuqaleni komnyaka ubesebalelwa emabhukwini entshantshu yeligi yeCastle Lager iFC Platinum leChicken Inn. Lelinye iqembu le-South Africa belibalisa ukumthenga.
Lumdlali uke wafuna ukuya eSudan kumaqembu abalisa iAl-Merreikh, Al Hilal, Al Ahly Shendi le-Al Khartoum SC.
Kodwa, ngesizini ka-2021 uzabe ekhona kuTshilamoya.
UMuduhwa uvumile ukudlalela iHighlanders okwesizini eyodwa.
Loba yona iHighlanders ingafuni ukuthi udaba lolu luphume emphakathini, iphephandaba likazulu liyabika ukuba ngaphandle kukaMuduhwa, bakhona abadlali abazimisele ukuhlala eqenjini.
UAndrew Mbeba, uRay Lunga loAriel Sibanda sebebike ukuba abayindawo.
Isikhulumi seHighlanders uRonald Moyo uthe okwakhathesi angeke abelamandla okukhuluma ngodaba kodwa basalungisisa.
“Siphezulu kokuqoqa amalungiselelo esizini ngakho kunzima ukuphawula isimo seqembu,” kutsho uMoyo.
UMuduhwa uthe inhliziyo yakhe lokhe iseqenjini loba isifiso sokudlala phetsheya sikhona.
“Ngilokhu ngingumdlali weHighlanders, akulanto etshintshileyo,” kutsho lumdlali.
UMuduhwa ungomunye wabadlali ababonakala bedinga imkhuleko yenhlanhla kuMphurofethi Mutumwa kunyanga ezedluleyo.
IBosso ilungiselela isizini kanje ingela mqeqetshi wayo uMark Harrison.
Ukusayina kukaMuduhwa kube zindaba ezimnandi kubalandeli labathandi beqembu abakade sebedanile ngokulahlekelwa ngabadlali.
Phakathi komnyaka lo, iBosso ibalekelwe nguBrian Banda osedlalela iFC Platinum loTinashe Makanda owakhetha ukuya kusitha esikhulu iDynamos.
